भांगरभूंय | प्रतिनिधी
पणजी : गोंयच्या शाळांनी फुडल्या शिक्षणीक वर्सा सावन राष्ट्रीय शिक्षण धोरणाचो विस्तार करतले. हातूंत जून म्हयन्या सावन अदीक वर्गाचो आसपाव जातलो. गोंय सरकार शिक्षणीक वर्स २०२६-२७ सावन राष्ट्रीय शिक्षण धोरणाची अंमलबजावणी आनीक व्यापक करतले. तातूंत तिसरी, चवथी, पांचवी, सातवी आनी आठवेच्या वर्गाचो आसपाव करतले. हाका लागून हें धोरण बाळवाटिका, पुर्वतयारी आनी माध्यमीक पांवड्या मेरेन, अंशतः माध्यमीक पांवड्या मेरेन विस्तार करतले.
तशेंच, अंमलबजावणी पयलीं शिक्षणीक आनी अभ्यासक्रमा कडेन संबंदीत चिंता उणी करपाची गरज आशिल्ल्याचें कारण दिवन राज्ज्यान यत्ता इकरावेच्या स्तराचेर एनईपीची अंमलबजावणी मुखार धुकल्ली. गोंय राज्य शिक्षणीक संशोधन आनी प्रशिक्षण परिशद (एससीईआरटी) नवीन एनसीईआरटी पाठ्यपुस्तकां सयत यत्ता पयली ते आठवे मेरेन एनईपीची अंमलबजावणी करतलें. जाल्यार णव्वी आनी धावेचे वर्ग सध्याच्या पाठ्यपुस्तकां सयत सुरू उरतले. यत्ता सवे खातीर सादर केल्ल्या पाठ्यपुस्तकां प्रमाण तयार केल्ली येवपी पाठ्यपुस्तका, भुरग्यांचे पुराय उदरगतीचेर लक्ष केंद्रीत करून भारतीय ज्ञान प्रणालीक (खघड) मुख्य प्रवाहांतल्या शिक्षणांत आसपावन घेतली.
हे विशीं म्हायती दितना एससीईआरटीची संचालक मेघना शेटगांवकार हांणी, यत्ता पयली ते आठवी खायत एनईपीची अंमलबजावणी येवपी शिक्षणीक वर्सा पसून नव्या पाठ्यपुस्तकां सयत करतले. २०२६-२७ ह्या शिक्षणीक वर्सा सावन, एनईपीत बाळवाटिका स्तर, पूर्वतयारी स्तर, माध्यमीक स्तर आनी माध्यमीक स्तराच्या कांय भागांचो आसपाव आसतलो. आमी यत्ता इकरावे खातीर एनईपीची अंमलबजावणी मुखार धुकलपाचो निर्णय घेतला, कारण फुडें वयचे पयलीं शिक्षणीक नदरेन पुरायेन तयार आसप गरजेचें, अशें तांणी म्हणलें.
गोंय टप्प्याटप्प्यान एनईपीची अंमलबजावणी करता. मुळावो स्तर (बालवाडी १) २०२३-२४ त सुरू केलो, उपरांत २०२४-२५त बालवाडी २ आनी माध्यमीक स्तर (यत्ता णववी) सुरू केला. २०२५-२६ त, एनईपीचा विस्तार माध्यमीक स्तर (यत्ता सवी) आनी यत्ता धावी मेरेन केला. एनईपी खाला, मुळाव्या स्तरांत ३-८ वर्सां, पूर्वतयारी स्तरांत ८-११ वर्सां, माध्यमीक स्तरांत ११-१४ वर्सां आनी माध्यमीक स्तरांते १४-१८ वर्सां पिरायेचो आसपाव आसा.
राज्याचो हेतू २०३० मेरेन एनईपीची अंमलबजावणी पुराय करपाचो आसा. जातूंत २०२७-२८ मेरेन सगल्या वर्गांचो आसपाव करतले. उपरांत क्लस्टर निर्मिती आनी भौतीक पुनर्ररचने खातीर दोन वर्सां समर्पीत करतले. शेटगांवकार हांणी, नव्या पाठ्यपुस्तकांत आशयाचो भार उणो करतले. कृती-आधारीत शिक्षण, प्रकल्प आनी अनुभवात्मक कार्यांचेर चड भर दितले. हाका लागून राष्ट्रीय शालेय शिक्षण अभ्यासक्रम आराखडो २०२३ प्रमाण पिराये प्रमाण योग्य उदरगत सुनिश्चीत जातली.
पोरण्या अभ्यासक्रमांतल्यान नव्या अभ्यासक्रमांत सहज संक्रमण जावचें म्हणून नव्या शिक्षणीक वर्साचे सुरवातेक शिक्षक आनी विद्यार्थ्यां खातीर तीन सप्तकांचो; मुखेलपणान कृती-आधारीत सेतू अभ्यासक्रम आयोजीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
