भांगरभूंय | प्रतिनिधी
सैमीक सोबितकायेची संवसार भर नामना आशिल्ल्या आमच्या शांत गोंयांत हालीं खून, चोरयो, मारपेट, सान चलयांचेर अत्याचार, भिरांकूळ गुन्यांवकारी गजाली घडत आसात. ताका लागून पयलींचे तुळेन फाटल्या दोन वर्सां सावन गोंयांत येवपी भोंवडेंकारांचो आंकडो उणो जायत चल्ला. सरकार भोंवडेंकारांक आकर्शीत करपाचे खूबशे यत्न करता ही गजाल खरी आसली तरीय जंय भंय थंय कोण येतलो? गोंय मुक्ती पयलीं सावन वास्को बायणा दर्यादेगेर शिंदळकेचो वेवसाय चलतालो तेन्ना, गोंयांत येवपी भोंवडेकार सगल्यांत पयलीं ‘बायणा किदर है’ अशे विचारताले. तांकां गोंयच्यो दर्यादेगो, हांगा सवाय मेळपी सोरो इतलेंच खबर आसतालें. तेन्ना बायणा वेश्यावस्ती खाप्यां गुन्यांवकारांचें ठिकाण आशिल्लें. बायणा आमच्या माणकुल्या गोंयाक लागिल्लो काळो दाग आशिल्लो.
मुक्ती उपरांत जायते राजकी पक्ष सत्तेर येवन गेले, पूण दरेका सरकारन बायणांतल्या शिंदळकी वेवसायाचेर आडनदर केली. मात जेन्ना भारतीय जनता पक्षाचें सर्गेस्त मनोहर पर्रीकार सरकार सत्तेर आयलें तेन्ना तांणी ह्या वेवसायाचेर कायदेशीर कारवाय करून बायणा शिंदळकी वस्ती सामकी मातयेभरवण केली. हांगा बायणाचो विशय घेवपाक कारण म्हणल्यार सद्या गोंयांत दिसान दीस वाडत चलिल्लो गुन्यांवकारी वावर.
एका तेंपार गोंयांत खंयच्याय म्हालांत फारपेटाचे घडणुकेंत कोणाचो अंत जालो वा अपघात घडलो जाल्यार ताचे सावट पुराय गोंयभर पातळटालें. पुलिशेंत मनीसबळ कमी आसून लेगीत गुन्यांवकाराक सोदून ताका योग्य ती ख्यास्त दिताले. पूण हालींच्या दिसांनी गुन्यांवकारी प्रकरणां वाडत आसात आनी ताचेर कोणाचोच ताबो ना अशें म्हाका दिसता.
कांय वर्सा आदीं उतर गोंयांत ब्रिटीश चली स्कार्लेट बलात्कार प्रकरण आंतरराष्ट्रीय पांवड्यार बरेंच गाजिल्लें. गोंय सरकारान त्या प्रकरणाची दखल घेवन खोलायेन चवकशी केल्ली हातूंत मातूय दुबाव ना. पूण ब्रिटीश सरकारान तांचे पद्दतीन चवकशीचें तंत्र वापरून बलात्कार करपी मनशाचो सोद घेवन पिडेस्तीक न्याय मेळोवन दिलो ही हांगा लक्षांत घेवपा सारकी गजाल आसा. आमच्या देशांतले न्याय वेवस्थे विशीं चड सांगपाची गरज ना. पूण गोंया सारक्या ल्हान राज्यांत आज वायट कर्तुबां धुमशेणां कांडीत आसात तीं खंय तरी थांबूंक जाय. नाजाल्यार भौसाचो न्याय वेवस्थेचेर आशिल्लो विस्वास वतलो, आनी मागीर गोंयचें बिहार जावपाक वेळ लागचो ना अशें म्हाका सांगीन दिसता.
आमच्या देशाचे राज्य घटनेंत दरेक नागरिकाक देशभरांत स्थलांतर करपाचो हक्क दिला. पूण दुसऱ्या राज्यांत वचून जाय तशी मनमानी करूंक सांगूक ना. आयज गोंयांत परप्रातियांचो आंकडो हिसपा भायर वाडला. ते गोंयांत आयिल्ले पोट भरपाक. कारण गोंयकारांक पयलीं सावन विदेशांत नोकरे खातीर वचपाची संवय. कारण गोंयांत मेळटल्या पगाराचेर पोट भरपाक शकता, पूण फुडारा खातीर गुंतवणूक करपाक शकनात हें ताचें फाटलें कारण. तीच गजाल परप्रांतियांची. ते गोंयांत येतात हांगा जोडटात, जमनी घेतात आनी हांगाच स्थायीक जातात. हांगा एक प्रस्न उप्रासता ते जी कायदेशीर, बेकायदेशीर जमनी घेतात तांकां त्यो कोण विकता? आमचेंच गोंयकार न्हय? मागीर चूक कोणाची दितल्याची काय घेतल्याची? देखीक, गोंयांत म्हाले, गवंडे, मेस्त, च्या दुकानकार, खाजेकार, भजेकार हांची लेगीत भायल्यांनी सुवात घेतल्या. दरेका कॉन्ट्रॅक्टरा कडेन शेंकड्यानी मजूर भायलेच आसतात. ते मेळत थंय रावतात. तांचें व्हेरिफिकेशन लेगीत जायना. खून, चोरयो करून ते गोंयांतल्यान धांव मारतात. हाचेर ताबो दवरूंक जाय अशें म्हाका दिसता.
पयलीं, गोंयची लोकसंख्या आतांचे परस खूब उणी आशिल्ली. सोऱ्याचीं बार्रां लेगीत उणींच. पूण आतां गोंयच्या गांवगिऱ्याया वाठारांनी लेगीत कितलिंशींच सोऱ्याचीं बार्रां पळोवंक मेळटात. ह्या वेसनांत भर घालपाचो काय महसूल वाडवपाचो यत्न? कांय म्हयन्या पयलीं पणजे आनी कुडचड्यार मेळून दोन तीन सुवांतेचेर गांजा ह्या घुंवळे वखदाचीं रोयिल्लीं वनस्पत मेळ्ळी. घुंवळे वखदांचे वेसन गोंयचीं दर्यादेगां तशेंच शारां मेरेन मर्यादीत आशिल्लें. तें आतां गांवगिऱ्या वाठारांनी पाविल्ल्यान तरणाटे वायट वेसनाचे भकीक पडल्यात. ताका लागून कायदो सुवेस्था घटमूट करून लोकांनी सरकाराक तेंको दिवचो अशें म्हाका सांगन दिसता.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
