भांगरभूंय | प्रतिनिधी
पणजी ः रेसोनिया लिमिटेडाच्या गोवा तमनार ट्रान्समिशन प्रोजेक्ट लिमिटेडान (GTTPL) 400 केव्ही धारबांदोडें सबस्टेशनाक 220 केव्ही शेल्डें सबस्टेशनाक जोडपी 220 केव्ही ट्रान्समिशन लायन काल सुरू केली. गोंयांतली वीज पायाभूत सुविधा वाडोवपाचे नदरेन हो म्हत्त्वाचो पांवडो आसा.
हाका लागून शेल्डेंक वीज पुरवण हस्तांतरीत करपाची सुवीधा मेळटली, दक्षिण गोंयांतली विजेची मुळावी बांदावळ घटमूट जातली आनी ह्या वाठारांत लोडशेडींगाच्यो घडणुको उण्यो जाल्यो. ह्या यशाक लागून रेसोनिया लिमिटेड कंपनीन राज्याक घटमूट आनी विस्वासांत घेवपा सारकी वीज पुरवण दिवपा खातीर म्हत्वाचें पावल उबारलां.
म्हापश्याक धारबांदोड्याक जोडपी 400 केव्ही ट्रांसमिशन लायन 400/ 220 केव्ही धारबांदोडा उपकेंद्र तमनारान उबारलां. हाचे पयलीं 7 आनी 11 नोव्हेंबर 2024 दिसा शेल्डें- म्हापशें लायन एक आनी दोन सुरू केल्ली. उपकेंद्रांत संबंदीत कामां पुराय जाल्यांत. हे नवे घडामोडीक लागून हो प्रकल्प पुराय जावपाच्या म्हत्वाच्या पांवड्यार पावला, जाका लागून गोंयांत चड घटमूट, लवचीक वीज प्रसारण जाळें तयार करपाक मेळ्ळां.
वीज क्षेत्राची वाडत वचपी मागणी पुराय करपी उच्च दर्जाचे मुळावे प्रकल्प उबे करपाक रेसोनिया लिमिटेड कंपनीच्या वचनबद्धतेचो गोंय तामनार प्रकल्प हो एक गवाय आसा. ह्या प्रकल्पांत म्हापश्याक धारबांदोड्याक जोडपी 400 केव्ही ट्रांसमिशन लायन बांदप, तशेंच धारबांदोड्यां 400/ 220 केव्ही उपकेंद्र स्थापन करप हांचो आस्पाव आशिल्लो.
खाशेली गजाल म्हणल्यार, हो प्रकल्प “फर्स्ट टायम रायट” तत्वाचेर सुरू केल्लो.
वीज क्षेत्रांतल्या वाडट्या मागणींक पाळो दिवपी उच्च दर्जाचे मुळावे बांदावळ प्रकल्प दिवपाक रेसोनिया लिमिटेडच्या समर्पणाचें उदाहरण म्हणल्यार हें काम. कंपनीच्या अणभवाक लागून गोंय तमनार प्रसारण प्रकल्प यशस्वीपणान चालीक लावपाक मेळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
