भांगरभूंय | प्रतिनिधी
240 शिक्षकांक अभ्यासक्रम लागू करपा विशीं प्रशिक्षण
पणजी: गोंयांतल्या विशेश भुरग्यां खातीर आशिल्ल्या शाळेंतल्या बौद्धीक दिव्यांग विद्यार्थ्यां खातीर रोखडोच प्रमाणीत अभ्यासक्रम सुरू करतले.
शाळांनी राष्ट्रीय बौद्धीक दिव्यांग व्यक्ती सक्षमीकरण संस्थेचो (एनआयईपीआयडी) दिशा हो अभ्यासक्रमक शिकयतले. दिवाळे उपरांत हाची अंमलबजावणी करतले. गोंयच्या बौद्धीक दिव्यांग विद्यार्थ्यांक हाचो लाव जातलो. हे खातीर सद्या 240 शिक्षकांक हो अभ्यासक्रम लागू करपा विशीं प्रशिक्षण दिलां.
केंद्र सरकाराच्या सेवा पखवाडा अभियाना खाला राज्य शिक्षण संशोधन आनी प्रशिक्षण परिशद (एससीईआरटी), एनआयईपीआयडी आनी राज्य दिव्यांग आयुक्त कार्यालय हांचे वतीन शिक्षकां खातीर आठ दिसांच्या कार्यशाळेचें आयोजन केलां. बुधवारा मध्य प्रदेश आनी गोंयांत ऑनलायन पद्दतीन हाचो उक्तावण सुवाळो जालो. ह्या वेळार दिव्यांग सक्षमीकरण खात्याचे सचीव राजेश अग्रवाल हांणी गोंयांत दिशा अभ्यासक्रमाच्या अंमलबजावणेक फुडाकार घेतिल्ले खातीर उपकार मानले.
मुंबयंतल्या जय वकील फावंडेशनाच्यो अर्चना चंद्रा हांणी सांगलें, दिशा अभ्यासक्रम हो बौद्धीक दिव्यांग भुरग्यां खातीर एक प्रमाणीत अभ्यासक्रम आसा. 2019 वर्सा एनआयपीआयडीन ह्या अभ्यासक्रमांक मंजुरी दिली. सद्या महाराष्ट्रांतल्या 460 विशेश शाळांनी हो अभ्यासक्रम वापरतात. फावंडेशनान ह्या अभ्यासक्रमाच्या देशभर अंमलबजावणे खातीर एनआयईपीआयटी सयत समजिकायेची कबलात केल्या.
हातूंत मुल्यांकना खातीर डिजिटल प्लॅटफॉर्म, शिक्षकां खातीर मॅन्युयल आनी विद्यार्थ्यांच्यो कार्यपुस्तिका आसात. दिशा वेबपोर्टल शिक्षकांक ऑनलायन मुल्यांकन करपाक आनी विद्यार्थ्यांच्या प्रगतीचें निरिक्षण करपाक सक्षम करता. तशेंच शाळा, जिल्हो, राज्य पांवड्यार रियल टायम डेटाची म्हायती दिता. राज्य अपंग व्यक्ती कार्यालय आयुक्त गुरुप्रसाद पावसकार हांणी गोंयांत हो अभ्यासक्रम सुरू केल्ले खातीर एनआयईपीआयडी आनी फावंडेशनाचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
