भांगरभूंय | प्रतिनिधी
गोंय जैविविधता मंडळाची अहवालांतल्यान शिटकावणी
बांदकाम, जमीन वापर बदलाक लागून रानांचेर हावळ
अस्तंत घांट, जनावरां, सुकण्यांचेर परिणाम जावपाचो भंय
भांगरभूंय । प्रतिनिधी
पणजी : बांदकाम प्रकल्प, भौशीक मुळाव्या सुविधांचें बांदकाम, अपारदर्शक पर्यावरण मुल्यांकन आनी जमीन वापर बदलाक लागून गोंयच्या रान वाठाराचेर संकश्ट आयलां. हे संकश्ट टाळपाचें आसा जाल्यार बेगोबेग हातूंत हस्तक्षेप करपाची गरज आसा, अशी शिटकावणी गोंय जैविविधताय मंडळाच्या अहवालांतल्यान दिल्या.
गोंय जैविविधताय मंडळाच्या जैविविधताय कृती आराखड्याच्या अहवालांतल्यान ही गजाल मुखार आयल्या. अहवालांत दिल्ले म्हायती प्रमाण रानां मारपाचे प्रक्रियेक लागून गोंयच्या रानां वाठारांचें घट्टण जालां. हाचें फाटलें कारण म्हणल्यार जमीन वापरांत बदल, बांदकाम प्रकल्प, अपारदर्शक पर्यावरण प्रभाव मुल्यांकन अहवाल आनी रस्ते, वीज, रेल्वे हे सारिकिल्ले मुळावे सुविधा प्रकल्प. मंडळान ह्या तीन कारणांक तांबडे श्रेणींत घालून रान वाठार संकश्टांत आशिल्ल्याचें सांगलां आनी हातूंत बेगिनांत बेगीन हस्तक्षेप करपाची सुचोवणी केल्या. ह्या तीन कारणांक लागून अस्तंत घांट, व्हडलीं सस्तन जनावरां आनी गोंयच्या विशिश्ट सुकण्यांचेर हाचो परिणाम जातलो. तशेंच रानांक लागपी उजो, कास करप आनी पर्यटनाचें चेपण ह्यावूय कारणांक लागून रान वाठार तांबडें श्रेणींत घातल्यात.
हातूंत बेगोबेग हस्तक्षेप करपाची सुचोवणी केल्या. उज्याक लागून रान वाठार उणो जाला, कासाक लागून रानवटी जिवांचें प्रमाण उणें जावन तांच्या वेवसायांत वाड जाल्या. पर्यटन वाठाराच्या चेपणाक लागून जनावरांचेर मानसीक आनी शारिरीक परीणाम जातलो. तेचवरी आक्रमक प्रजातींचो आस्पाव, मनीस- रानवटी जीव हस्तक्षेप, सरंक्षीत वाठारांत कर्मचाऱ्यांचो उणाव हीं कारणां नारंगी श्रेणींत घालून ह्या कारणांक लागून रान वाठार धोक्यांत आयला, अशें म्हणलां. ह्या गजालींनी हस्तक्षेप करचो अशी सुचोवणी केल्या. आक्रमक प्रजातींक लागून मूळ वनस्पतींचो उणाव जातलो, मनीस-राननटी जीव हस्तक्षेपाक लागून मनीस तशेंच जनवारांचो जीव वतलो अशी शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
