भांगरभूंय | प्रतिनिधी
वास्को : गोंयच्या मुखेल रस्त्यांचेर एआय-आधारीत कॅमेरे बसोवपाची प्रक्रिया बेगीनूच सुरू जातली. आठ म्हयन्यांत हे कॅमेरे लावपाचो यत्न आसा. ह्या कॅमेर्याक लागून वाहनचालकांच्या दरेके कृतीचे रेकॉर्डींग करतले. ह्या तंत्रज्ञानाक लागून अपघात टाळपाक मजत जातली तशेंच वाहनचालकां मदीं एके तरेची शिस्त लागतली, अशें येरादारी मंत्री मावीन गुदिन्हो हांणी सांगलें.
वाडें हांगच्या सेंट अँड्रयू उच्च माध्यमीक विद्यालयांत आयोजित १४ व्या रस्तो सुरक्षा सप्तकाचे उक्तावण कार्यावळीक मंत्री गुदिन्हो उलयताले. ह्या वेळार येरादारी खात्याचे संचालक प्रविमल अभिषेक, गोवा कॅनचे निमंत्रक रोलँड मार्टिन, सेंट अँड्यू उच्च माध्यमीक विद्यालयाचे वेवस्थापक फादर रॉनी फर्नांडीस हजर आशिल्ले.
रस्ते बांदप, अपघात जावपी वाठार, तशेंच हेर विवीध उपायां विशीं सरकारान काम केल्ल्यान पयलींच रस्त्यांचे अपघात उणे जाल्यात. लोक हेल्मेट वा सीट बेल्ट घालचे परस दंड भरप पसंत करतात. तांची एक चूक हेरांचो, स्वताचोय जीव घेवपाक शकता. हाची जाणीव तांणी दवरपाची गरज आसा. रस्त्याचेर शिस्त सामकी गरजेची रस्त्यावेले अपघात उणे करपाचो एकूच मार्ग म्हणल्यार नेमांची खर अंमलबजावणी करप, अशें तांणी मुखार म्हणलें.
अपघातांतली लुकसाण भरपाय हो सुरक्षेचो पर्याय न्हय अशेंय तांणी स्पश्ट केलें. अपघात जाल्ल्यांक दोन लाख रुपयांची भरपाय दिवपाची येवजण आसा. मात जिवाचें मोल इतलेंच व्हय? असो प्रस्न तांणी केलो. रस्तो सुरक्षा नेम सोपे आसात, तरी लोक ते नेम पाळिनात. दरेकल्याच्या अंतर्मनांतल्यान शिस्त येवपाक जाय असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
