गोंयच्या फुडारा खातीर एकठांय येवपाची निमाणी संद!

भांगरभूंय | प्रतिनिधी

ए क काणी याद जाता. काणी तशी पोरणी. पूण तिचो आशय सदांकाळ सुसंगत. पिळग्यान पिळग्यो जाणटेल्यांनी भुरग्यांक सांगिल्ली ही काणी. आयजवेर बुदवंत आनी गुणेस्त भुरग्यांनी समजिकायेन आनी लागणुकेन आचरणांत हाडिल्ली.
एक जाणटो मनीस आशिल्लो. कर्तुबान गिरेस्त जाल्लो! गरीब घराब्यांत जल्माक येवन लेगीत कश्टांनी आनी संघर्शान संपत्ती आनी प्रतिश्ठा मेळयिल्लो. जमनी वेल्या वास्तवाचें भान आशिल्लो. ताका चार पूत. आपणे कश्टांनी उबें केल्लें साम्राज्य आपले चारय जाण एकचारान रावल्यारच आपले फाटल्यान सांबाळूंक शकतले म्हणपाचें ताका खबर आशिल्लें. पूण पुतांक ते विशीं जागरूक कसो करतलो? तो चिंततालो. एक दीस ताका एक युक्त येवजली. ताणें आपल्या चारूय भुरग्यांक एकठांय आपयले. तांच्या हातांत एकेक बडी दिली आनी ती मोडूंक सांगली. दरेकल्यान आपापल्या हातांतली बडी सहजतायेन मोडली. ताणे परतून एकदां दरेकल्याच्या हातांत एकेक नवी बडी दिली. हे खेपेक ताणें चारय पुतांक तांच्या हातांतली बडी एकठांय करून वांगडा बांदपाक सांगली. उपरांत ताणें एकठांय बांदिल्ल्यो चार बडयो दरेकल्याक मोडपाक सांगल्यो. कोणाकच तें शक्य जालें ना. भुरग्यांचेर जावंक जाय आशिल्लो तो परिणाम बेस बरो जालो. बापायच्या मरणा उपरांत आपल्या पुराय आयुश्यांत तांणी एकठांय रावन बापायचो धंदो जतनायेन आनी हुशारकायेन सांबाळ्ळो आनी वाडयलो.
अमीतबाब पाटकार, विजयबाब सरदेसाय, अमीतबाब पालेकार आनी मनोजबाब परब ह्या गोंय मायेच्या चार पुतांक ही काणी खबर आसतलीच. गोंयच्या जनमानसांत सुवात आशिल्ल्या कॉंग्रेस, गोवा फॉरवर्ड, आप आनी रिवोल्युशनरी गोवन्स ह्या विरोधी पक्षांच्या मुखेल्यांनी हे काणयेचो आशय लागणुकेंत हाडपाची गरज आसा. समेस्त गोंयकारांची तशी इत्सा आसा.
हालींच गोंयांत जिल्हो पंचायतींची वेंचणूक घडून आयली. ह्या वेंचणुकेंत सगल्या विरोधी पक्षांनी एकठांय येवचें अशें सामान्य मनशाक दिसतालें. पूण तें घडूंक पावलें ना. सामान्य मनशाक खाता कोण? ताचें मत तर वेंचणुकेंत पयशे दिवन वा कसलेंय हांयस दाखोवन वा एखादी भिरांत दाखोवन सहजपणान मेळोवं येता. समान्य मनीसय आदलें सगलें विसरता आनी फाल्यांचें फाल्यां पळोवया, ह्या खिणाचो फायदो घेवया हे वृत्तीन वागता.
सद्याच्या सरकारा विशीं लोकां मदीं प्रचंड राग आनी तिडक आसा. भ्रश्टाचार, असंवेदनशिलताय आनी मदांधपणां तेंगशेर पावल्यांत. हे विशीं लोक उक्तेपणी उलयतात. लोकांचीं कामां पयशे खावयले बगर जायनात. हेरांचें सोडूनच दियात, सत्ताधारी पक्षाच्या कार्यकर्त्यांक आनी तांच्या जाळवणदारांक लेगीत कामां खातीर संबंदितांक लांच दिवची पडटा म्हणपाच्यो साबार देखी हालींसराक उक्त्यो जाल्यात. बेकायदेशीर कामां करतले लोक आपलीं कामां सहजपणान आडमार्गान करून घेतात. सामान्य मनशाक मात साद्या साद्या कामां खातीर सरकारी कार्यालयांनी फावटी मारच्यो पडटात. लोक रस्त्यार अपघातांनी वळवळून, नायट क्लबांनी उज्यांत हुलपून, उत्सवांनी भगदडींत घुसमटून मरत आसात. मरण सवाय जालां. कोणाकच कोणाच्या मरणाचें ना दुख्ख, ना सुतक! सामान्य मनीस शेणला, निर्शेला. ताका कोणचोच भरवंसो ना जाला. खून, दरोडे, टोळी युद्धां, हप्ते, घोटाळ्यांच्यो खबरो वाचूंक वा आयकूंक मेळनात असो दीस क्वचितूच उदेंता. हीच काय ती काकासायबांनी ‘पुण्यभुमी’ मानिल्ली देवभुमी असो प्रस्न पडटा.
अश्या वेळार सगल्या विरोधी पक्षांनी एकठांय रावन लोकहिताचें चिंतपाची गरज आसा. पूण दुर्दैवान कॉंग्रेसीचें तोंड उदेंतेक, गोवा फॉरवर्डाचें अस्तमतेक, आपाचें उत्तरेक जाल्यार रिवोल्युशनरी गोवन्स पक्षाचें दक्षीणेक आसा! सगल्यांच्या मदीं बसून सत्तेंतलो भारतीय जनता पक्ष तांकां आपल्या तालार नाचयता अशें चित्र दिसता. युतीचें सोडूनच दिवया, एकामेकांचेर सकयल्या थरार वचून वैयक्तीक पांवड्यार टिका करपाक लेगीत हे फुडारी फाटल्यान रावनात.
2024 वर्सा घडून आयिल्ले लोकसभा वेंचणुकेंत दक्षीण गोंयांत कॉंग्रेस पक्षाचो उमेदवार कॅप्टन विरियातो फेर्नांडीस जिखपाक शकलो तो विरोधी पक्षांच्या एकजुटीक लागून हें कोणच न्हयकारचो ना. प्रशासकी यंत्रणा, पयश्यांचो प्रचंड प्रमाणांत उपेग जावन लेगीत कॅप्टन विरियातो वेंचणूक जिखलो ह्या गजालींतल्यान सगल्यांनी खरें म्हणल्यार देख घेवंक जाय आशिल्ली. पूण ती घेवपाची कोणाकच गरज दिसना. युतीची शक्ती जाणपाची तांक विरोधी पक्षाच्या फुडाऱ्यां मदीं आसा काय हो प्रस्न आसा. जिल्हो पंचायत वेंचणुकेंत ताचें दर्शन सगल्यांक घडलां.
पक्ष थळावो आसूं वा राष्ट्रीय, गोंयच्या राजकी फुडाऱ्यां कडेन जाय ती परिपक्वताय ना अशें सद्याचें चित्र आसा. फुडाराचो अदमास आनी परिणाम हांचें तांकां भान ना. गोंयच्या भल्या खातीर आपणे एक- दोन पावलां फाटल्यान घेवपाचें मोठेपण कोणा कडेनच ना. परिणाम म्हूण सगलेच फोंडांत पडटात. अंतर्मूख जावन कोणच विचार करिना. आपूण फोंडांत पडिल्ल्याचें दुख्ख कोणाकच ना. दुसरो फोंडांत पडला ताचोच दरेकल्याक आनंद!
2027 वर्साच्या मार्चांत गोंयांत विधानसभेची वेंचणूक घडून येवपाची आसा. हे वेंचणुकेंत सगल्या विरोधी पक्षांनी मना- काळजान सोयरीगत करची अशी समाजीक वावुरपी आनी समान्य मनशाची इत्सा आसा. भाजपांत आयात केल्ले फुडारी वर्सांचीं वर्सां प्रामाणीकपणान वावुरिल्ल्या तळमळी कार्यकर्त्यांचेर शेक गाजयतात. तेय अस्वस्थ आसात. आयचे घटकेक ते लेगीत योग्य पर्याय सोदतात. पूण हे वटेन विरोधी पक्षाचे फुडारी सोयरीगती आदींच घटस्फोटाची आंखणी करतात. खंतीची गजाल ही!
गोवा फॉरवर्ड पक्षाचे अध्यक्ष विजयबाब सरदेसाय हे विरोधी पक्षांच्या मुखेल्यां मदीं सगल्यांत चड अणभवी आनी परिपक्व आसात. तांचे कडेन सगल्यांक एकठांय हाडपाचें आनी बांदून दवरपाचें कौशल्य आसा. तांणी ह्या वावरांत चड नेटान फुडाकार घेवचो. विरोधी पक्ष सक्षम जालो जाल्यारच सत्ताधारी पक्षाचेर अंकूश उरतलो.
‘बॅटर लेट दॅन नॅव्हर’ अशी इंग्लीशींत एक म्हणणी आसा. विधानसभा वेंचणुके आदीं विरोधी पक्षां कडेन लागीं लागीं पंदरा म्हयन्यांचो काळ आसा- आत्मपरिक्षण करपाक, आत्मचिंतन करपाक, आनी आत्म्याक धरून गोंयच्या फुडारा खातीर एकठांय येवपाक!

अनंत अग्नी
9422439903