भांगरभूंय | प्रतिनिधी
पणजी : गोंयांक नितळ राखपाचें काम राज्यभरचे नितळसाण कर्मचारी करतात. एका अर्थान गोंयच्या पर्यटनांत नितळसाण कर्मचार्यांचें व्हड योगदान आसा अशें केंद्रीय समाज कल्याण मंत्री डॉ. वीरेंद्र कुमार हांणी म्हणलें. बिरेस्तारा पणजे नितळसाण कर्मचार्यांक सुरक्षा कीट वाटप कार्यावळींत ते उलयताले. ह्या वेळार नगर विकास खात्याचे संचालक ब्रिजेश मणेरीकार, महापालिका आयुक्त क्लेन मदेरा, प्रभात कुमार सिंग, मोहंमद शब्बीर आनी हेर अधिकारी हजर आशिल्ले.
गोंयचो पांचवोचार सैम, रानां, सोबीत दर्यादेगांचो अणभव घेवपाक देशी, विदेशी पर्यटक हांगा येतात. हांगा आयले उपरांत तांकां नितळ दर्यादेगो पळोवपाक मेळटात. तांच्या मनांत गोंयची बरी इमेज तयार जाता. आपल्या गावांनी परतल्या उपरांत ते गोञय नितळ आनी सुंदर आशिल्ल्याचें सांगतात. अशी प्रतिमा तयार करपाक नितळसाण कर्मचारी हे पड्ड्या फाटले कलाकार जावन आसात. तांकां मानान जीण जगपाक मेळप, ही आमची सगल्यांची जापसालदारकी जावन आसा. नितळसाण राखप हें फकत तांचेंच काम न्हय. ती सगल्यांची जापसालदारकी, असो उलो डॉ. कुमार हांणी मारलो.
कांय वर्सां आदीं प्रधानमंत्री नरेंद्र मोदी हांणी नितळ भारत अभियान सुरू केलें. ताचे वांगडा नितळसाण कर्मचार्यां खातीरूय विवीध येवजण्यो सुरू केल्यो. हातुंतलोच नमस्ते येवजण सुरू केली. हातूंत सीवेज वा सेप्टीक टँक साफ करपी कर्मचार्यांक सुरक्षा उपकरणां, भलायकी विमो दितात. तशेंच तांकां अशे परिस्थितींत काम करपाचें प्रशिक्षण दितात. येवजणेचेंे ध्येय हातान करपी काम पुरायेन बंद करून ते सुवातेर यंत्रणांचो वापर करप आसा. फुडल्या कांय वर्सांनी हें ध्येय पुराय करपाचो आमी यत्न करतात, अशें तांणी मुखार सांगलें.
घाणयारें उदक वा सेप्टीक टँक नितळ करपी कर्मचार्यांची नोंदणी करप, तांकां प्रशिक्षण दिवप गरजेचें. हाका लागून अपघात टाळूं येतात. नगरपालिका, महापालिकांनी तांच्या अधिकार मळावेली नितळसाण कर्मचार्यांची नोंदणी करून तांकां प्रशिक्षण दिवचें. खाजगी टँक वाले, तशेंच तांच्या कर्मचार्यांची नोंदणी करप गरजेचें अशें डॉ. कुमार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
