भांगरभूंय | प्रतिनिधी
पणजी: गोंयचो पयलो एआय-निर्मीत ‘जॉब नीडेड’ हो मारियो पिमेंटा हांणी दिग्दर्शीत केल्लो चित्रपट नागालँड आंतरराष्ट्रीय चित्रपट महोत्सवांत पावलो. संवसारांतल्या विंगड विंगड चित्रपटां वांगडा सर्त करीत, ह्या चित्रपटान जायते पुरस्कार जिंकून संवसारीक पांवड्यार मान्यताय मेळयली. विशेश म्हळ्यार, सर्वोत्तम एआय लघुपट पुरस्कार मेळोवपी हो एकूच चित्रपट थारलो. तशेंच मारियो पिमेंटा हांकां सर्वोत्तम दूरदृष्टी दिग्दर्शक पुरस्कारान सन्मानीत केलें.
तशेंच ‘जॉब नीडेड’ हांणी उतकृश्ठ इंग्लीश चित्रपट आनी उत्कृश्ठ लघुपट हे पुरस्कार जिंकले. तशेंच, सर्वोत्तम कथे खातीर ज्युरी मेंशन आनी पटकथे खातीर महोत्सव विशेश उल्लेख मेळून वट्ट स पुरस्कार आपल्या नांवार केले. आंतरराष्ट्रीय चित्रपटां कडेन सर्त करीत मेळिल्लें हें येस गोंयां खातीर संवसारीक चित्रपट माचयेर अभिमानाचो खीण थारलो.
फकत २१ वर्सां पिरायेचे आसतना मारियो पिमेंटा समकालीन गोवन चित्रपटसृष्टींतल्या सगल्यांत तरणाटो आनी दुरदृश्टी आशिल्ल्या आवाजां मदलो एक जावन उबे रावल्यात. चित्रपट दिग्दर्शक आनी सांस्कृतीक क्युरेटर म्हणून ते तंत्रज्ञानाक सशक्त कथन आनी समाजीक चिंतना वांगडा जोडटा. ‘जॉब नीडेड’ वरवीं विकसीत जावपी नवे पिळगेचो गोवन चित्रपट चळवळींत तांचो मोलाचो वाटो आनीक घट जाला.
हो चित्रपट गोंयचो पयलो एआय-निर्मीत चित्रपट जावन एक इतिहासीक टप्पो थारलो आनी राज्याचे चित्रपटसृश्टीक नव्या युगांत घेवपाचो संकेत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
