गोंयच्या नुस्त्याक आग्नेय आशियांत पसंती

भांगरभूंय | प्रतिनिधी

पणजी : गोंयांतलें नुस्तें आग्नेय आशियांतल्या देशांनी सगल्यांत आवडीन खातात. अर्थीक वर्स 2024- 25 त गोंयांतल्यान 45,469 टन नुस्तें हेर देशांनी निर्गत केल्लें. तातूंत सगल्यांत चड 37,779 टन (83 टक्के) नुस्तें आग्नेय आशियायी देशांत निर्गत केल्लें. तातूंत थायलंड, सिंगापूर, मलेशिया, म्यानमार, कंबोडिया, व्हिएतनाम अश्या देशांचो आस्पाव आसा. वट्ट निर्गत जाल्ल्या नुस्त्याचें मोल 788.81 कोटी रुपया आशिल्लें. तातूंतलें आग्नेय आशियांत 596.20 कोटी रुपया मोलाचें नुस्तें निर्गत केल्लें.

मेळिल्ले म्हायती प्रमाण, गोंयांतल्या निर्गत जावपी नुस्त्यांत गोठयल्लीं सुंगटां, माणक्यो, सायां उदकांतलें नुस्तें तशेंच दर्यांतल्या हेर नुस्त्यांचो आस्पाव आसा. आग्नेय आशिया उपरांत मध्यपूर्वेंतल्या देशांनी 46.81 टक्के कोटी रुपया मोलाचें 1,824 टन नुस्तें निर्गत जालें. युरोपी देशांनी लेगीत गोंयांतल्या नुस्त्याक बरी मागणी आसा. वयल्या काळांत युरोपियन युनियनांतल्या देशांनी गोंयांतल्या 1,279 टन नुस्त्याची निर्गत जाली. हाचें मोल 44.04 कोटी रुपया इतलें आशिल्लें. जाल्यार जपानांत 3.35 कोटी रुपयांच्या 62 टन नुस्त्याची निर्गत जाली.

वयल्या काळांत यूएसांत गोंयांतलें 51 टन नुस्तें निर्गत जालें. हाचें मोल 3.26 कोटी रुपया आशिल्लें. ते भायर वयले देश सोडून संवसारभरांतल्या हेर विवीध देशांनी गोंयांतल्या 943 टन नुस्त्याची निर्गत जाली. हाचें मोल 29.62 कोटी रुपया आशिल्लें. अर्थीक वर्सां प्रमाण पळयत जाल्यार फाटल्या तीन वर्सांत गोंयांतलें नुस्तें उत्पादन निर्गत उणी जाल्या. 2022-23 त नुस्तें उत्पादन निर्गत 63,333 टन आशिल्ली. हाचें मोल 1,007 कोटी रुपया आशिल्लें. 2023- 24 त निर्गत 55,167 टन जाल्यार मोल 934.20 कोटी रुपया आशिल्लें.

सुंगटांची निर्गत देंवली

मेळिल्ले म्हायती प्रमाण 2022- 23 चे तुळेंत 2024- 25 त गोंयांतल्यान सुंगटां आनी हेर ताज्या नुस्त्याची निर्गत सुमार 3 हजार टनांनी उणी जाल्या. जाल्यार माणक्यांची निर्गत सुमार 1 हजार टनान वाडल्या.