गोंयच्या निवृत्त कर्मचार्‍यांचो न्या. रिबेलो हांचे चळवळीक तेंको

भांगरभूंय | प्रतिनिधी

पणजीः निवृत्त कर्मचारी संघटणेन न्या. फेर्दीन रिबेलो हांची गोंय वाटावपाची चळवळ आनिक सोंसू नेजो हांकां आपलो तेंको जाहीर केला. रिअल इस्टेल लाॅबी गोंयची रानां बोडकीं करपाक उठला आनी सरकारा वांगडा कांय विरोधी आमदार लेगीत हात मेळोवन आसा. देखून रिबेलो हांणी सुरू केल्ले चळवळींत आमकां गोंयच्या फुडारा खातीर आस्त दिसून येता अशें तांत्रिकी शिक्षण संचालनालयाचे आदले संचालक आल्वितो डिसोझा हांणी सांगलें.
पणजे आपयल्ले पत्रकार परिशदेंत संघटणेन हे चळवळीक आपलो तेंको जाहीर केलो. ह्या वेळार कर्मचारी संघटणेचे वांगडी डिसोझा उलयताले.
दाट रान वाठार, पर्यावरण संवेदनशील वाठारांत खुबशे बांधकाम प्रकल्प इतले आयिल्लेे आसात आनी हीं झाडां कातरपाक रान खातें परवानगी दित आसा. रान खात्याचें काम हीं झाडा राखपाचें. पूण तें उरफाटें चल्लां. दिसान दीस अटंगें रान वाठार, पर्यावरण संवेदनशील वाठारांत तशेंच खाजगी रान वाठारांत झाडां मारपाक परवानगी दिता, अशे डिसोझा हांणी सांगलें.
गांवची जैवविविधताय समिती पावसाच्या वेळार झाडां लायतात. मात एप्रिल, मार्च, फेब्रुवारी येता म्हणसर थंयसर तण सुकता आनी तणाक उजो लागून लायिल्लीं झाडां लासून वचपाच्यो आमकां नेमान घडणुको पळोवपाक मेळटात. ह्या झाडांचेर आशिल्ले सुकण्यांचे घोंटेर, तांतयां, पिलां भाजून वयतात. ह्या घडणुकांचेर नियंत्रण हाडपाक जाता. थोडेंच गोंय साल्वार जालां तें परत रिअल इस्टेट लोबी, डेव्हलेपर्स आनी बिल्डर काबार करपाक उठल्यात, असो आरोप डिसोझा हांणी केलो.
ते भायर सरकार आनी विरोधक हात मेळोवन काम करतात देखून ह्या विनाशाक आनीक गती मेळटा. ही एक चिंतेची गजाल आसा. जेन्ना विरोधक बळकट आसता तेन्ना त्या सरकाराक नियंत्रणात दवरपाक शकतात. मात कांय विरोधी आमदार आसात हे सरकारा वांगडा मेळून आसात ही सद्याची स्थिती पळयल्यार सिध्द जाता, असो दावो डिसोझा हांणी केलो.
ह्या कारणा खातीर आमी न्या. फेर्दिन रिबेलोची चळवळ आनीक सोंसूं नेजो हाका तेंको दिला. जो विनाश गोंयचो चालू आसा, ते प्रमाण गोंय आमकां फुडले पिळगे खातीर उरतले अशें दिसना. आमकां हे चळवळीत खूब आस्त दिसून येता. आमी व्हडा प्रमाणात एकठांय येवन रिबेलो हांकां तेंको दिवपाक जाय जाल्यार आमी बदल दाखोवपाक शकतले, असो उलो डिसोझा हांणी मारला.