भांगरभूंय | प्रतिनिधी
पणजी: भलायकी सेवा संचालनालया वतीन दाबोळेचें गोंय आंतरराष्ट्रीय विमानतळ आनी मोपाचें मनोहर आंतरराष्ट्रीय विमानतळ अशा दोन विमानतळांचेर अँटिजेन चांचणी सुरू करपाचो निर्णय घेतला. ही चांचणी अनिवार्य करूंक नासली तरी जी 20 बसकां खातीर येवपी निमंत्रितां खातीर जतयानेची उपाय येवजण म्हूण ही चांचणी करतले.
‘ना लक्षण ना चांचणी’ हें धोरण यंत्रणांनी स्विकारिल्ल्यान फक्त लक्षणां दिसून येवपी निमंत्रितांचीच चांचणी करतले. दोनूय विमानतळार आमी लाळेच्या नमुन्याची चांचणी सुविधा सुरू केल्या. हे खातीर अणभवी डॉक्टर, नर्स हांचे सयत पॅरामेडिकल कर्मचारी आनी अॅम्बुलन्स सेवा तैनात केल्यात. चांचणी सेवा सुरू जाल्या आनी ही चांचणी 20 एप्रील मेरेन सुरू उरतली अशी म्हायती जी-20 खातीरचे ओएसडी (भलायकी सेवा) डॉ. केदार रायकार हांणी दिली. ग्रँड हयात गोवा हांगाय लाळेची चांचणी सुरू करतले अशें तांणी स्पश्ट केलें.
सोमार ते बुधवार ह्या काळांत भलायकी सेवा विशयाचेर कार्यगटाची दुसरी बसका ज्या रिसॉर्टांत जातली थंय अँटिजेन चांचणी सुविधा सुरू केल्या.
आगमनाच्या दिसा सावनूच चांचणी केंद्रां पुराय दीस चालू उरतलीं. संबंदीत विमानतळांचेर आनी हॉटेलांनी 24 वरां भलायकी पंगड कार्यरत उरतलो अशें राजशिश्टाचार सचीव आनी जी-20 खातीरचे नोडल अधिकारी संजीत रॉड्रिगीश हांणी सांगलें.
हॉटेल ग्रँड हयात गोवा हांगा राज्यांतली डिजिटल भलायकी सेवा विशयाचेर पयली बसका जातली थंय आपत्कालीन कक्ष उबारतले. गोंय वैजकी म्हाविद्यालय आनी भलायकी सेवा संचालनालयांतल्या डीएचएसच्या दोतोरांचो पंगड कसलीय भलायकेची स्थिती हाताळपा खातीर तयार आसतलो. तशेंच आपत्कालीन स्थितीक सामकार वचपा खातीर भलायकी सेवा संचालनालया वरवीं नेमणूक केल्ले दोतोर, नर्स आनी पॅरामेडिक्सचो पंगड आनी सुसज्ज अॅम्बुलन्स लेगीत उपलब्ध आसतल्यो. कोवीड-19 चीं लक्षणां आशिल्ली व्यक्ती खंयच्याय वेळार स्वताची तपासणी करून घेवंक शकतात अशें डॉ. रायकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
