भांगरभूंय | प्रतिनिधी
पणजी : गोंयचे दर्यादेगेची लांबाय चड आशिल्ल्याचें सुदारीत मेजणे उपरांत दिसून आयलां. एका नव्या सर्वेक्षणांत राज्याच्या दर्यादेगेची लांबाय १९३.९५ किमी इतली मेजल्या. १९७० च्या दसकांत ती १६० किमी आशिल्ली. आतां तीं ३३ किमी चड आशिल्ल्याचें सुदारीत मेजणे उपरांत दिसून आयलां.
हे विशीं अधिकृत म्हायती मुखार आयल्या. केंद्रीय भूविज्ञान राज्यमंत्री जितेंद्र सिंग हांणी राज्यसभेंत देल्ले लेखी जापेंत सुधारीत आंकडेवारी दिल्या. ह्या बदलाक लागून मुळाव्या सुविधांचें नियोजन आनी आपत्ती नियंत्रणाचे तयारेक मजत जाता, अशेंय स्पश्ट केलां. पुनर्विश्लेशण हें देशव्यापी अभ्यासाचो एक भाग आसा. जातूंत आधुनीक तंत्रज्ञानाचो वापर करून देशाच्या दयारदेगांचें पुनर्मुल्यांकन केलां.
राष्ट्रीय जलविज्ञान कार्यालयान देशाचो सगल्यांत आदलो वैज्ञानीक विभाग आनी राष्ट्रीय मॅपिंग एजन्सी, ‘सर्व्हे ऑफ इंडिया’ हांचे मजतीन पुनर्विश्लेशण केलें. हें काम राष्ट्रीय सुरक्षा परिशद सचिवालयांतल्या संदर्भां वरवीं केल्ल्याचें सिंग हांणी म्हणलें. अधिकारी अधिक अचूक मोजमाप करपा खातीर प्रगत जीआयएस सॉफ्टवेअर आनी भरती-ओहोटीच्या रेशेच्या उच्च ‘रिझोल्यूशन डेटा’चेर निंबून आशिल्ले, अशें मंत्र्यांचे जापेंत म्हणलां.
दयारदेग संरक्षण आनी उदरगत सल्लागार समितीन देशांतल्या सगल्या राज्यां खातीर सुदारीत दर्यादेग लांबायेक मान्यताय दिल्या. राष्ट्रीय पांवड्यारूय, नव्या विश्लेशणा खाला भारताची दर्यादेग ७,५१६ किमी वेल्यान ११,०९८ किमी मेरेन आशिल्ल्याची म्हायती सिंग हांणी दिली.
गोंयां खातीर, लांब दर्यादेगांक लगून बंदर, मुळाव्यो सुविधा प्रकल्प आनी पर्यटन मळा खातीर नियोजन घटमूट जावपाची अपेक्षा आसा. अधिकार्यांक चक्रीवादळ, हुंवार आनी भूसंखलनां आड सुधारीत आपत्ती जोखीम विश्लेशण आनी तयारीची अपेक्षा आशिल्ल्याचें सिंग हांणी म्हणलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
