भांगरभूंय | प्रतिनिधी
पणजी : राज्यांतल्या राजकी पक्षांनी पाेस्टाच्या गोंय विभागांत महाराष्ट्रांतल्या व्यक्तींक नोकरी दितात हाचो जायते फावट विरोध केला. गोंयच्या पोस्ट विभागांत थळाव्यांकूच संद दिवची अशी मागणीय केल्ली. मात आजूनय अशी भरती सुरू आशिल्ल्याची म्हायती लोकसभेंतल्या प्रस्नांच्या जापेंतल्यान मेळ्ळ्या.
हे विशीं खासदार विरीयातो फर्नांडीस हांणी प्रस्न केल्लो. केंद्रीय संज्ञापन राज्यमंत्री डॉ. प्रेमसानी चंद्रशेखर हांणी दिल्ले जापे प्रमाण गोंयच्या पोस्टांत २०२० ते २०२४ महाराष्ट्रांतल्या वट्ट ७१ जाणांची पोस्टमन म्हणून भरती केल्या. हातूंंत २०२० त ५, २०२१ वर्सा १९, २०२२ वर्सा १८, २०२३ वर्सा १० तर २०२४ वर्सा १० जाणांचो आसपाव आसा.
केन्नाय पदां खातीर तात्पुरत्या स्वरूपांत भरती करतात आनी भरती प्रक्रिये उपरांत अशा व्यक्तींक काडटात. गोंयां सयत हेर कॅडरची भरती प्रक्रिया ही पोस्ट खात्याच्या भरती नेमां प्रमाणूच करतात. टपाल खात्याच्या गोंय विभागांत पोस्टमन म्हणून भरती जावपा खातीर मराठी आनी कोंकणी भास येवप गरजेचें, अशें जापेंत म्हणलां.
मेळिल्ले म्हायती प्रमाण, गोंय पोस्ट विभाग हो महाराष्ट्र सर्कलांत येता. गोंय स्वंतत्र विभाग करचो हे खातीर राज्य सरकारान केंद्राक मागणीय केल्ली. केंद्रीय मंत्री श्रीपाद नायक हांणी कांय वर्सां आदीं गोवा पोस्ट विभागांत महाराष्ट्रांतल्या लोकांच्यो जावपी भरपी आड तिडक उक्तायल्ली. तशेंच केंद्र सरकाराच्या गोंयांत आशिल्ल्या विवीध संस्थांनी थळाव्यांक संद दिवची अशी मागणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
