गोंयच्या जैतांत विकास, सुयश पर्जळ्ळे

भांगरभूंय | प्रतिनिधी

विकास सिंगान 9 बॉलांनी 4 चवके आनी 2 सक्यांचे मजतीन काडिल्ल्यो नाबाद 31 धांवड्यो आनी सुयश प्रभुदेसायान नोंदयिल्ल्या अर्द शेंकड्या नेटार गोंय पंगडान सय्यद मुश्ताक अली टी-20 क्रिकेट सर्तींतलें आपलें पयलें जैत जोडलें. सुयशान 45 बॉलांनी 66 धांवड्यो केल्यो. हातूंत आठ चवक्यांचो आनी एका सक्याचो आस्पाव आशिल्लो.

काल हैदराबादाच्या राजीव गांधी आंतरराष्ट्रीय स्टेडीयमाचेर खेळयिल्ले मॅचींत गोंय पंगडान महाराष्ट्र पंगडाक 3 बॉल आनी 4 विकेटींनी हारयलो. चवथे मॅचींतलें हें गोंयचें पयलें जैत थारलें.

गोंयान टॉस जिखून महाराष्ट्राक पयलीं बॅटींग करपाचें आमंत्रण दिलें. महाराष्ट्रान निर्धारीत 20 ओव्हरींनी 6 विकेटी व्हगडावन 193 धांवड्यो केल्यो. ताच्या अंकीत बावणेन सगल्यांत चड 51 धांवड्यो केल्यो. गोंया खातीर शुभम तारी आनी फॅलिक्स आलेमांवान दरेकी 2 विकेटी घेतल्यो.

धांवड्यांचो फाटलाव करपी गोंयची सुरवात बरी जाली ना. ईशान गडेकार आनी कश्यप बखले हे शुन्याचेर बाद जाले. अझान थोटा लेगीत वैयक्तीक 23 धांवड्यांचेर बाद जाल्या उपरांत गोंयची स्थिती पावर प्लेंतूच 3.5 ओव्हरींनी 3 बाद 34 अशी जाली.

ते उपरांत सुयशान मुखेली दीपराज गांवकारा वांगडा मेळून चवथे विकेटी खातीर 56 धांवड्यांची भागिदारी करून गोंयचो डाव सांबाळ्ळो.

दीपराज गांवकार बाद जाल्या उपरांत सुयशान दर्शन मिशाळा वांगडा मेळून पांचवे विकेटी खातीर 61 धांवड्यांची म्हत्वाची भागिदारी केली. गोंयची धांवसंख्या 173 गरज आसतना खेळपट्टीचेर जम मेळोवपी सुयश प्रभुदेसाय बाद जालो. ते उपरांत विकास सिंगान 9 बॉलांनी नाबाद 31 धांवड्यांची खेळी करून गोंयाक जैत मेळोवन दिलें. विकास आनी मोहीत रेडकारान स बॉलांनी 20 धांवड्यांची भागिदारी केली.

थोडे भितर धांवतकटोः महाराष्ट्र, 20 ओव्हरींनी 6 बाद 193 धांवड्यो (अर्शीन कुलकर्णी 44, अंकीत बावणे 51, राहुल त्रिपाठी 24, निखील नायक 40, धनराज शिंदे 16, दिव्यांग हिंगणेकर 4, ऋतुराज गायकवाड नाबाद 2, राजवर्धन हंगर्केकर नाबाद 2 धांवड्यो.

बॉलींगः शुभम तारी 4-0-28-2, मोहीत रेडकार 4-0-48-0, फॅलिक्स आलेमांव 4-0-37-2, दर्शन मिशाळ 4-0-30-0, दीपराज गांवकार 3-0-32-1, विकास सिंग 1-0-15-0.

गोंय, 19.3 ओव्हरींनी 6 बाद 194 धांवड्यो ( ईशान गडेकार 0, अझान थोटा 23, कश्यप बखले 0, सुयश प्रभुदेसाय 66, दीपराज गांवकार 26, दर्शन मिशाळ 25, विकास सिंग नाबाद 31, मोहीत रेडकार नाबाद 4 धांवड्यो).

बॉलींगः मुकेश चौधरी 4-0-33-3, राजवर्धन हंगर्गेकर 4-0-40-2, अर्शीन कुलकर्णी 3.3-0-49-0, विकी ओस्तवाल 3-0-29-0, प्रशांत सोलंकी 3-0-21-0, दिव्यांग हिंगणेकर 2-0-15-1.