भांगरभूंय | प्रतिनिधी
मुख्यमंत्री : केंद्रीय पंचायत राज मंत्रालया कडल्यान निधी
भांगरभूंय । प्रतिनिधी
पणजी : केंद्रीय पंचायत राज मंत्रालयाच्या निधीचो वापर करून पुराय राज्याच्या जमनीचें सरकार सर्वेक्षण करतलें. दोन राज्यां मदल्या जमनीचें प्राधान्यान सर्वेक्षण जातलें, अशें मुख्यमंत्री डॉ. प्रमोद सावंत हांणी सांगलें. सर्वेक्षणा खातीर केंद्रान निश्चीत केल्लो दर उणो आसा. हाका लागून सर्वेक्षणाक कळाव जालो, अशें तांणी सांगलें.
जमनीचेर अतिक्रमणां जावपाचें प्रमाण वाडत आसा. हाचे खातीर पुराय राज्यांतल्या जमनीचें सर्वेक्षण करपाची मागणी करपी खासगी थाराव आमदार राजेश फळदेसाय हांणी मांडलो. ह्या थारावाचेर खूब वेळ चर्चा जाली. थारावाचेर उलयतना मुखयमंत्री डॉ. सावंत हांणी ही म्हायती दिली. सर्वेक्षण करपाच्या उतरा उपरांत आमदार राजेश फळदेसाय हांणी खासगी थाराव फाटीं घेतलो.
राना हक्क कायद्या खाला सरकारान काय जमनीचें सर्वेक्षण केलां. दरेका चौखण मिटराक 1.22 रुपया अश्या दरान हें सर्वेक्षण जालां. पुराय राज्याचें सर्वेक्षण करपाचें जालें जाल्यार 655 कोटी रुपया खर्च येतलो. गरज पडटा त्या जमनीचें वा वाठाराचें सरकार सर्वेक्षण करता. केंद्रा कडल्यान निधी मेळ्ळे उपरांत सर्वेक्षण करप शक्य जातलें, अशें येणावळ खात्याचे मंत्री बाबूश मोन्सेरात हांणी सांगलें.
ह्या खासगी थारावाचेर राजेश फळदेसाय, निलेश काब्राल, विरेश बोरकार, कार्लोस फेरेरा आनी युरी आलेमांव हांचीं भाशणां जालीं. हाचे पयलीं 1976 त जमनीचें सर्वेक्षण जाल्लें. हाका आतां 47 वर्सां जावन गेल्यात. अनमोड घांटाचेर आशिल्ले एक बांदकाम आतां कर्नाटकांत गेलां, अशें राजेश फळदेसाय हांणी सांगलें.
जमनीचेर अतिक्रमणां जायत आसात. तशेंच जमनीचेर नवीननवीन बांदकामां जावपा सयत गैरवेव्हार सुरू आसात. पुराय जमनीचें सर्वेक्षण जाल्यार हिताचें थारतलें, अशें कार्लोस फेरेरा हांणी सांगलें. खंयच्या सर्वे नंबराचेर कसलें बांदकाम आसा, जमीन कसले तरेची आसा, तें कळपा खातीर सर्वेक्षण जावप गरजेचें आसा, अशें विरेश बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
