भांगरभूंय | प्रतिनिधी
गांवठी वखद पावलें दिल्ली, मुंबय
भांगरभूंय । समीप नार्वेकार
पणजीः आयच्या वैजकी विज्ञानांत गोंयची आयुर्वेदीक गांवठी वखदां दुयेसां आड बरी पारतात. एलोपॅथी वखदांच्या काळांत अजूनय गोंयकार गांवठी वखदांचेर विस्वास दवरतात. गोंयचो आदिवासी समाज पिळग्यान पिळग्यो हीं वखदां गोंयकारां मेरेन पावयता. थंडी ते गोडेंमुता मेरेन रानांत मेळपी गांवठी वखदां आदिवासी समाजान गोंयांतच न्हय जाल्यार गोंया भायर लेगीत पावयल्यात.
पणजे लोकोत्सवांत तारामती गांवकार ही खोतीगाव काणकोण सावान रानातल्यान गावठी वखदा हाडून विकता. तीणे व्हडली दोतोरांची पदवी घेतील्ली ना पुण जाण्ट्यांनी दिल्ले गीन्यान घेवन गावठी झाडा पाल्या वखदा काडटां. सैमान दिल्ले वरदानाचो लाव घेवन ते लोकांचे भलायकी खातीर तांचो वापर ते करत आयल्यात. तशेंच ही गावठी वखदा कशी घेवप केन्ना घेवप हाची म्हायती बारीकसाणेन ही बायल आपले गिरायकांक सांगता. हे वखदांखातीर सरकारान हे बायलेक माची दिंवकना पुण घरातच बसून ही बायल पुराय गोंयभर आपली वखदांचो प्रसार करता.
हे विशीं उलयतना तारामती गांवकार हांणी सांगलें, गोडेमूत, कामीण, वाय, सर्पीण, बीक, बायलांची मासीक पाळी, मुतखडो, छंडी, बायलाचे कांतीचें दुयेंस, खाज, धातू सारकिल्ल्या दुयेंसांचेर आमी गांवटी वखद तयार करतात.
सगळ्या दुयेसांचेर आमचे कडेन वखदां आसात, पूण कांय वखदां ह्या लोकोत्सवांत अजून आमी हाडूंक नात. आमचीं खूबशीं वखदां गोंया भायर पावल्यांत. खूबशे लोक वखदां खातीर आमचे कडेन संपर्क करतात आनी मुद्दाम पयसुल्ल्यान येतात. हीं वखदां खूब जाणांचे भलायकेक बऱ्याक पडल्यात, हेच खातीर आमच्या वखदांची मागणी वाडटा, अशें तारामती म्हणटां.
आमचे कडेन लोक फोना वयल्यान संपर्क करतात. आमी तांकां हीं वखदां धाडटांत वा कांय जाण घरां कडेन येवन व्हरतात. आमचो पसरो बी काय ना, घरांतूच आमी हो वेवसाय करतात. जर खंयचेय कार्यावळीक आमकां आपयले जाल्यार आमी हीं वखदां घेवन वतात. आमचीं वखदां दिल्ली आनी मुंबय मेरेन पावल्यांत. मागणी आयले उपरांत आमी पोस्टांतल्यान तीं धाडटात, अशें तारामती हिणें सांगलें.
आमी सगळ्या दुयेंसांचेर वखदी पालो काडटात. जाण्ट्यां सावन आयल्ली ही परंपरा आमी फुडें व्हरतात. तशेंच आमच्या भुरग्यांनी ही परंपरा फुडें चलोवप हें गरजेचें. आमी आमच्या भुरग्यांक गांवठी वखद कशें काडपाचें तें शिकयलां आनी फुडाराक ही परंपरा चलपाक जाय म्हूण भुरग्यांक सांगलां, अशें तारामती हिणें सांगलें. आमी अशीच केन्नाय दोगरांचेर वा रानांनी वतात. सगळीं वखदीं झाडां आमी वळखतात. सकाळ वा सांजे थंय एक पासय मारून झाडाचो पालो आनी मुळां काडून आमी घरा हाडटात. घरा हाडले उपरांत ती धुवन बरी नितळ करतात, ती मागीर तासून सुकयले उपरांत ताचो पिठो करून हीं वखदां दितात, अशें तारामती हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
