भांगरभूंय | प्रतिनिधी
जर्मनीच्या बर्लिन शारांत जाल्ले स्पेशल ऑलिम्पीक संवसारीक गिमाळ्या खेळां सर्तींत दोळे दिपकावपी प्रदर्शन करपी गोंयच्या खेळगड्यांक काल उर्बेभरीत येवकार दिलो.
काल सांज वेळार दाबोळी विमानतळाचेर राज्य दिव्यंगजन आयुक्त कचेरी वतीन येवकार सुवाळो आयोजीत केल्लो. ढोल ताशांच्या गजरांत गोंयच्या 23 वांगड्याच्या पथकाक व्हडा उमेदान येवकार दिलो.
ह्या वेळार समाज कल्याण मंत्री सुभाष फळदेसाय, कुडटरीचे आमदार रेजिनाल्ड लॉरेन्स, हळदोणचे आमदार कार्लुस परेरा, राज्य दिव्यांगजन आयुक्त गुरुप्रसाद पावसकार, राज्य दिव्यांगजन आयुक्त कचेरीचे सचीव ताहा हाजिक, समाज कल्याण खात्याचे संचालक अजीत पंडवाडकार हे मानेस्त खेळगड्यांक येवकार दिवपाक विमानतळाचेर उपस्थीत आशिल्ले.
पदक जिखप्यां मदीं विन्सन पेस, जोएल रॉड्रिगीश, फ्रान्सीस पारिसापोगू आनी अमन नदाफ (भांगरा पदक, 7 ए सायड फुटबॉल), अस्लम गंजनावर (रुप्या पदक,ज्युडो), मानफिल फेर्राव (भांगरा पदक, बास्केटबॉल), तानिया उसगांवकार (रुप्या पदक आनी कांश्या पदक, स्कॅटिंग), गीतांजली नागवेंकार (भांगरा पदक, मैदानी खेळ) आनी सिया सरोद (दोन भांगरा पदकां, पावरलिफ्टिंग) हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
