भांगरभूंय | प्रतिनिधी
खासदार सदानंद शेट तानावडे हांची राज्यसभेंत मागणी
भांगरभूंय । प्रतिनिधी
पणजीः गोंयचीं खाजनां राखून दवरून तीं पुनर्जिवीत करपा खातीर केंद्रान खाशेलो निधी दिवपाची गरज आसा. तशेंच तांत्रिकी गिन्यान आनी बळिश्ट धोरणाची गरज आसा, अशी मागणी खासदार सदानंद शेट तानावडे हांणी राज्यसभेंत केली.
राज्यसभेंत मागण्यांचेर विशेश उल्लेख करतना गोंयात खाजनांचें पुनर्जिवीत आनी मजत हे खातीर तानावडे हांणी आपल्यो मागण्यो मांडल्यो. शेंकड्यांनी वर्सां आदीं आमच्या पुर्वजांनी तयार केल्लीं खाजनां हें एक आभियंत्रिकी नवल जावन आसा. भरती- सुकती येवपी न्हंयांच्या तोंडार मानशी घालून गोंयचे मागास लोक खाजनां कसतात. हीं खाजनां मनीस, दर्यांतले जीव, झाडां- जनावरां, शेतां, स्थलांतरीत सुकणीं, कांदळी, रानां आनी सोबीत पोंयों हांचें उत्कृश्ट मिश्रण आसा. पूण हीं खाजनां उश्ण हवामान, हवामान बदलांक जावपी घडणुको, देखीक पावसाचे पद्दतींत बदल, हुंवार आनी दर्याची वाडटी पातळी ह्या कारणांक लागून खाजन शेतांचेर संकश्ट आयलां, असो हुस्को तानावाडे हांणी उक्तायला.
ह्या घटकांक लागून जमनीची सासणा खातीर धूप जावप, न्हंयेच्यो देगो व्हांवून वचप, खारें उदक वचून जमनींतले उदक पेड्डेर जावप आनी कुशीच्या गांवांनी हुवार येवपाक लागल्यात. हे खातीर हीं खाजनां पुनर्जिवीत करपा खातीर केंद्रा कडल्यान खाशेलो निधी, तांत्रीक गिन्यान आनी बळिश्ट धोरणांची गरज आसा, अशी मागणी तानावडे हांणी केली. ह्या खाजनांनी हजारांनी शेतां लागवडी खाला हाडटात. तांचे सासणा खातीर लुकसाण जावपाचें बंद करपा खातीर हवामान बदल, दर्याचे पातळीत वाड आनी पावसाचे पद्दतींत बदल ह्या घटकां आड गोंयाक चड सक्षम करपाची गरज आसा. हीं खाजनां फक्त आमचें सांस्कृतीक दायजूच राखचें ना, जाल्यार पर्यावरण शाश्वतेक उर्बा दितलें, अशे तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
