भांगरभूंय | प्रतिनिधी
डॉ. देविया राणे : 25 एप्रील सावन काजू फेस्त
भांगरभूंय । प्रतिनिधी
पणजीः गोंयचें काजू उत्पादन सरासरी जें उणें आसा तें वाडून राष्ट्रीय सरासरी मेरेन पावचे. तशेंच गोंयच्या काजींक संवसारीक पांवड्यार एक माची मेळून काजकारांक ताचो लाव मेळचो ह्या उद्देशान गोंय रान उदरगत महामंडळ (जीएफडीसी) काजू फेस्त हाची तिसरी आवृत्ती घडोवन हाडटात, अशें म्हामंडळाची अध्यक्ष तशेंच पर्येंची आमदार डॉ. देविया राणे हांणी सांगलें.
पणजे दयानंद बांदोडकार मैदानाचेर 25 एप्रील सावन सुरवात जावपी काजू फेस्त 2025 ची म्हायती दिवपा खातीर वन भवनांत घेतिल्ले पत्रकार परिशदेंत डॉ. देविया राणे उलयताली. ह्या वेळार प्रधान मुखेल रान संरक्षक राजीव कुमार गुप्ता आनी जीएफडीसीचे वेवस्थापक संचालक नंदकुमार परब हजर आशिल्ले.
गोंय रान उदरगत म्हामंडळ पयली काजू म्हामंडळ आशिल्लें, ते खातीर गोंयच्या काजू पिकांक म्हत्व मेळचें अशी दुरदिश्टी आमी दवरल्या, अशें डॉ. राणे हांणी सांगलें.
गोंयांत काजीं पिकां मदलो 12.5 टक्के वांटो जीएफडीसीचो आसा. काजू आमचे मुखेल फलोत्पादन पीक आसा, पूण काळ वता तशें काजूचें दायज आनी वळख शेणत चल्ल्या. हे खातीर काजूक म्हत्व मेळचें म्हूण आमी आगळो वेगळो काजू फेस्त मनोवपाचें थारयलां, अशें डॉ. राणे हांणी सांगलें.
फक्त काजू हें एक बी वा फळ मेरेन मर्यादीत दवरिनासतना आमकां काजू फाटली काणी सांगपाक जाय. मळो ते मेजा मेरेन हो काजू हाडपी काजकार, आप मजत गट आनी काजू सोरो तयार करपी आमचे कारागीर हांकां आमकां स्टार करपाक जाय. असल्या महोत्सवाचेर लोकांचो पयसो इबाड करतात असो आरोप विरोधक करतात, पूण आमकां काजूक संवसारीक माची दिवपाक जाय, अशें डॉ. राणे हांणी सांगलें.
गोंयचो काजू हेर राज्यांचे काजू परस रुचीक लागता. पूण हेर राज्यांचे तुळेंत गोंय राज्यांत काजूची पिकावळ उणी आसा. राष्ट्रीय सरासरीचे तुळेंत गोंयांत काजूचें उत्पादन सामकेंच उणें जालां. ह्या उत्पादनांत वाड जावची. तशेंच स्कॉच भशेन गोंयची फेणी संवसारीक पांवड्यार वचून ताच्या मोलांत वाड जावन उत्पादकांक फायदो जावचो, जे वरवीं म्हुट्ट्यांक बरो दर मेळून तांचो लाव काजकारांक आनी आप मजत गटांक जावचो, हो आमचो हेत आसा, अशें डॉ. राणे हांणी सांगलें. काजकारांक काजूचो दर 120 रुपया वयल्यान 164 रुपया मेरेन वाडोवपाचो बरो निर्णय सरकारान घेतला. पूण हें किमान आधारभूत मोल दरेका काजकारा मेरेन पावता काय ना हें विभागीय शेतकी अधिकाऱ्यान निश्चीत करपाक जाय. हे विशींची जापसालदारकी ह्या अधिकाऱ्यांक दिवन तांकां प्रशिक्षण दिवपाची गरज आसा, असो सल्लो डॉ. राणे हांणी दिलो.
काजींचें पुर्नजीवीत करपाचें काम सुरूः राणे
गोंय रान उदरगत म्हामंडळाच्यो गोंयांत 6,600 हॅक्टर काजी आसात. 2021 सावन ह्यो काजी पुर्नजिवीत करपाचें काम हातांत घेवन म्हामंडळान पोरूं 450 हॅक्टर काजी आनी अंदूं 280 हॅक्टर काजी पुर्नजिवीत केल्यात. फुडल्या तीन वर्सांत 1400 हॅक्टर काजी आमी पुर्नजिवीत करपाची मोख दवरल्या, अशें डॉ. देविया राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
