भांगरभूंय | प्रतिनिधी
पुरस्कारा सयत कलाकारांचे म्हायतीचो आसतलो आसपाव
पणजी : गोंयच्या सगळ्या कलाकारांची तांकां मेळिल्ल्या नामनो सयत वळेरी तयार जातली. पद्म, कला सन्मान वा हेर कसलो पुरस्कार संबंदीत कलाकाराक मेळ्ळा, ताची म्हायती आसतली, अशें कला आनी संस्कृती खात्याचे मंत्री ह्या नात्यान मुख्यमंत्री डॉ. प्रमोद सावंत हांणी सांगलें.
दिगंबर कामत हांच्या लेखी प्रस्नाक तांणी ही लेखी म्हायती दिली. गोंयचे बरेच चित्रकार, नाटककार, गायक, दिग्दर्शक हांचो देशविदेशांत भोवमान जाला. तशेंच गावगिर्या वाठारांत लेगीत बरेच कलाकार आसात. तांची वळेरी वा म्हायती सरकारकडेन आसा काय? असो लेखी प्रस्न तांणी केल्लो. तांच्या ह्या प्रस्नाक मुख्यमंत्र्यांनी ही लेखी जाप दिल्या. कलाकार, ताची म्हायती आनी ताका मेळिल्ली नाम्ना हांचो उल्लेख वळेरेंत आसतलो.
राज्य सांस्कृतीक पुरस्कार, कला गौरव पुरस्कार, कला वृद्धी पुरस्कार, युवा सृजन पुरस्कार हे पुरस्कार मेळिल्ल्या कलाकारांची वळेरी सरकाराकडेन आसा. कलेच्या मळार फकत मारियो मिरांडाक पद्मभूशण आनी पद्मविभूशण
कलेच्या मळार फकत व्यंगचित्रकार मारियो मिरांडा हांकां पद्मभूशण आनी पद्मविभूषण पुरस्कार फावो जाला. मारियो मिरांडा हांचो २००२ वर्सा पद्मभूशण आनी २०१२ वर्सा पद्मविभूशण पुरस्कारान भोवमान जालो. तशेंच चित्रकार लक्ष्मण पै हांकां १९८५ वर्सा पद्मश्री जाल्यार २०१८ वर्सा पद्मभूशण पुरस्कार फावो जालो.
पद्म पुरस्कार मेळिल्ल्या गोंयकारांची वळेरी :
कला मळार पद्मश्रीचे मानेस्त
विनायक खेडेकार (२०२१), रेमो फर्नांडीस (२००७), प्रसाद सावकार (२००६), मॅनुएल सांतान बाॅयर (२००५), लक्ष्मण पै (१९८५).
शिक्षण आनी साहित्य मळार पद्मश्रीचे मानेस्त : लँबर्ट मास्करान्हेस (२०१५), डॉ. मारीया अरोरा कुटो (२०१०), फादर रोमाल्ड डिसोझा (२०१०), सुरेश गुंडू आमोणकार (२००९), बा. भ. बोरकार (१९६७)
कला मळार पद्मभूशण
लक्ष्मण पै (२०१८), मारियो मिरांडा (२००२)
साहित्य मळार पद्मभूशण
रवींद्र केळेकार (२००८)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
