भांगरभूंय | प्रतिनिधी
कुडाळ आनी फर्मागुडयेर नोकर भरती आशिल्ल्याचे पोस्टर व्हायरल
पणजीः गोंयच्या एमआरएफ टायर्स कंपनी सिंधूदुर्ग कुडाळा नोकर भरती मेळावो घडोवन हाडटा. हे विशीं रेव्ह्युलेशनरी गोवन्स पक्षाचे मुखेली मनोज परब हांणी आक्षेप घेवन गोंयची खाजगी कंपनी नोकर्यो भायल्यांक विकतात आनी सरकाराचे हांचेर कसलेंच नियंत्रण ना. सरकारान GENनचे पाशियेंस काबार करचें न्हय, अशी शिटकावणी परब हांणी दिल्या. गोवा फाॅरवर्डाचे विजय सरदेसाय हांणीय गोंयच्यो नोकऱ्यो दुसऱ्या राज्यांतल्या उमेदवारांक मेळपाक जायना अशें ट्विट केलां.
मजगतीं, ही खबर बोगस. नोकर भरती गोंयांत आसा, अशें कंपनीच्या एका अधिकाऱ्याचें म्हणणें. ताणें ते संबंदीचो पोस्टरुय जारी केला.
महाराष्ट्र नवनिर्माण सेनेचे सिंधुदुर्ग जिल्लोध्यक्ष धीरज परब हांचे वतीन एमआरएफ टायर कंपनी गोंयांत २५० प्रशिक्षणार्थी तत्वांचेर पदां भरपा खातीर कुडाळांत १२ सप्टेंबराक नोकर भरती मेळवो घडोवन हाडटा. आठवी ते पदवीधरां खातीर रु. १७,५०० ते रु. १९,५०० दर म्हयन्याक पगार सयत दर वर्साक पगार वाड, रावपी आनी जेवणाची वेवस्था हे सारकिल्ल्यो सुविधा कंपनीन जाहीर केल्यात. हे विशीं जायरात मनसेन सिंधुदुर्गात उजवाडांक हाडल्या.
हे जायरातींचो आरजीपीचे मुखेली मनोज परब हांणी निशेध केला. खाजगी कंपनीन आमच्यो नोकर्यो हेर राज्यांच्या राजकारण्यां वरवीं भायल्यांक विकतात आनी सरकाराचेर हाचें कसलेंच नियंत्रण ना, अशी टिका तांणी केली.
भाजपाचें डबल इंजिन सरकार गोंयच्या ‘जेन झी’च्या पासियेसा वांगडा खेळटा. हे खपोवन घेवपा सारकें ना. ही अनाधिकृत नोकर भरतीक एमआरफ कशी मान्यताय दिवपाक शकता. उच्च शिक्षणीक पात्रताय आसून लेगीत गोंयकार ८ ते १० हजार पगाराचेर काम करतात आनी चड पगार आशिल्ल्यो नोकर्यो भायल्या लोकांक दितात, असो आरोप परब हांणी केलो.
कुडाळाक नोकर भरते विशींची जायरात फटीची आशिल्ल्याचें एमआरएफ कंपनीन स्पश्टीकरण दिलां. मुख्यमंत्री डॉ. प्रमोद सावंत हांकां बरयल्ल्या पत्रांत एमआरएफ कंपनीन म्हणलां, कुडाळ महाराष्ट्र जावपी नोकर भरतीची जायरात ही फटीची आसा. हे विशींची नोकर भरती १२ सप्टेंबराक आटीआय फार्मागुडी हांगासर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
