गोंयच्या ‘ऋषी’ लघुपटाची दोन आंतरराष्ट्रीय चित्रपट महोत्सवांनी निवड

भांगरभूंय | प्रतिनिधी

पणजीः गोंयच्या ‘ऋषी’ लघुपटाची दोन आंतरराष्ट्रीय चित्रपट महोत्सवांनी निवड जाल्या. 22 मार्चाक इलिनॉय – अमेरिकेक आर्ली थिएटर शॉर्ट फिल्म फेस्तांत आनी 26 ते 28 मार्च मेरेन बांगलादेशांत जावपी रिश्का फेस्तांत हो लघुपट दाखयतले.
22 मार्चाक इलिनॉय – अमेरिकेक आर्ली थिएटर शॉर्ट फिल्म फेस्तांत दाखोवपी ऋषी हो 15 शॉर्टलिस्ट केल्ल्या प्रोजेक्टांतलो एक आसा. मेसन सिटी, इलिनॉय हे सुवातेर आदारित हो फेस्टिव्हल दर वर्सां जाता आनी व्हड स्क्रीनीचेर कथाकथनाची कला सादर करता. तशेंच, थळावी आनी आंतरराष्ट्रीय अश्यो वेगवेगळ्यो कलाकृती दाखोवन आनी उपलब्ध साधनांचो वापर करून चित्रपट निर्मितीचो सोद घेवपाक प्रेक्षकांक प्रोत्साहन दिवपाचो उद्देश आसा. नव्या चित्रपट निर्मात्यांक प्रेरणा दिवपाचो यत्न करता.
26 ते 28 मार्च मेरेन बांगलादेशांत जावपी रिश्का फेस्तांत हो लघुपट दाखयतले. रिश्का कनेक्ट्स ह्यांच्या वतीन आयोजीत हो फेस्टिव्हल “बियॉन्ड द सिनेमा” ह्या थीमा खाला तिसऱ्या आवृत्तीन मनयतात. हो फेस्टिव्हल बंगाली आनी आंतरराष्ट्रीय सिनेमाचो उत्सव मनोवन, विविध संस्कृतींतल्या कथाकथन आनी नवोदित चित्रपट निर्मात्यांक एक माची दिता.

ऋषी हाचें दिग्दर्शन मारिओ पिमेंटा आनी अॅनलिसा रॉड्रिग्स हांणी केलां. ह्या चित्रपटांत अभिनेतो आनी संगीतकार सायरस फर्नांडीस मुखेल भूमिकेत आसा. तांच्या बरोबर मॉडेल आनी अभिनेती रोशनी मौर्या ही ‘झोया’ ह्या पात्रांत दिसता. विशेश म्हळ्यार ह्या चित्रपटाची कथा संवादां परस व्हॉयसओव्हराचेर आदारिल्ली आसा, जी वेवसायिक सूत्रसंचालक स्नेहा फर्नांडीस हिणें सादर केल्या.
हो चित्रपट मारिओ पिमेंटा आनी अॅनलिसा रॉड्रिग्स हांणी संकल्पित केलो, जंय अॅनलिसा हिणें फोटोग्राफी केलां आनी मारिओ हिणें संपादन केलां. ह्या चित्रपटाची कलाकार आनी तांत्रिक टीम तरणाटे विद्यार्थ्यांची आसा. सायरस फर्नांडीस आनी रोशनी मौर्या पणजेच्या डॉन बॉस्को कॉलेजांत मास कम्युनिकेशनच्या निमाणें वर्सांत शिकता. स्नेहा फर्नांडीस सेंट झेवियर्स कॉलेज, म्हापशें निमाणें वर्सांत शिकता.
ऋषी ह्या चित्रपटाचो मुखेल गाभो मोग, विरह आनी भावनिक समाधान ह्या विशयांचेर आदारित आसा. दरेकाच्या आयुष्यात एक “ऋषी” आसता, जो आपल्या जीविताचो अविभाज्य भाग जाता. ही कल्पना ह्या कथेन दाखयल्ली आसा. पूण, मरण अटळ आशिल्ल्यान, आपलो सगळ्यांत लागसारचो इश्ट गेल्यार तातुंतल्यान झोया कशी मार्ग काडटा, हें दाखयता. आत्मपरीक्षण आनी तिची इश्टीण अॅनलिसा हिच्या बरोबर जाल्ल्या भावनिक संवादांतल्यान, झोयाक ल्हवू-लव्हू समाधान मेळटा, सोडून दिवप, कृतज्ञता दाखोवप आनी निरोप दिवप शिकता.
ह्या आंतरराष्ट्रीय माचेर निवड जावप ऋषी खातीर एक म्हत्वाची गजाल. हो चित्रपट नव्या पिळगेच्या गोंयच्या चित्रपट चळवळीचो एक प्रतिनिधित्व करता, जंय तरणाटे चित्रपट निर्माते नवे प्रयोग करून कथाकथनाची मर्यादा फुडें वाडयता. हाका लागून आंतरराष्ट्रीय सिनेमाच्या मळार गोंयची वाडती उपस्थिती चड घटमूट करता.