भांगरभूंय | प्रतिनिधी
विजे आनी शिक्षण खात्याची बरी कामगिरी
पणजीः अंदू गोंय सरकाराच्या विविध २९ सरकारी खात्यांनी आदीवासी उप-येवजण खाला मेळिल्ल्या निधीचो ७४ टक्के वापर केला. सगल्यांत चड ९९ टक्के निधीचो वापर वीज खात्यान केला जाल्यार ८० टक्के नीधीचो वापर शिक्षण खात्यान केला. मात हो निधी दिवपी आदिवासी कल्याण खात्यान सामकोच उणो ३१ टक्के नीधीचो वापर केला.
आदिवासी कल्याण खात्यान आदीवासी उप-येवजण (ट्रायबल सब-प्लॅन’) खाला वर्स मेळिल्ल्या निधीचो वापर कसो केला हे विशींचो सविस्तर अहवाल जाहीर जाला. २०२५-२६ ह्या अर्थीक वर्सा खातीर वट्ट १,४९५.७३ कोटी निधी मंजूर जाल्लो, तांतूतलो १,११७.९३ कोटी इतल्या निधीचो जानेवारी मेरेन वापर जाला. विज आनी शिक्षण क्षेत्रांत हो निधी चड खर्च जाला.
ह्या अहवालांत विज खात्याक मेळिल्ल्या ५२० कोटी निधींतल्यान ५१८.४२ कोटी इतल्या निधीचो वापर जाला. तशेंच, शिक्षण खात्यान २१५.४५ कोटी निधींतलो १७४.३८ कोटी निधी खर्च करून आदिवासी वाठारांतल्या शिक्षणाक प्राधान्य दिलां. मात हे नीधीचो वापर करपात स्वतः आदिवासी कल्याण खात्यान मंजूर जाल्ले १३२.२३ कोटी मदलो ४२.०९ कोटी इतलोच निधी वापरला.
मजगतीं, पिवपाच्या उदकाचें खात्यान १६५ कोटी निधींतल्यान ११९ कोटी निधी वापरून उदका पुरवण सुधरायल्या. भौशिक बांदकाम खात्यान १२६ कोटी निधींतल्यान २७.६१ कोटी निधी खर्च केला. समाज कल्याण खात्यान ७०.०१ कोटी निधींतल्यान ६६.९३ कोटी निधी खर्च केला. भलायकी खात्यान ५६.१० कोटी निधींतल्यान ४७.२१ कोटी निधी वापरला. उच्च शिक्षण संचालनालयान ३७.०० कोटी निधींतल्यान २४.१५ कोटी निधी वापरला.
माहिती तंत्रज्ञान आनी कामगार आनी रोजगार खात्यां सारख्या संस्थांनी उरिल्ल्या निधीचो वापर करपाची प्रक्रिया सध्या सुरू आसा. आदिवासी समाजाच्या सर्वांगीण विकासा खातीर आनी तांकां मुखेल प्रवाहांत हाडपा खातीर सरकारान हो निधी योग्य रितीन वापरपाचें ध्येय दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
