भांगरभूंय | प्रतिनिधी
खासदार, आमदार म्हूण थारिल्ले अपात्र
ऐझवाल, खबरां संस्था : उत्तर गोंयचे आदले पुलीस अधिक्षक लालदुहोमा (लालदुहावमा) हांणी आयज मिझोरामाचे मुख्यमंत्री म्हूण सोपूत घेतलो. मिझोरामांत आतां मेरेनचे सगले मुख्यमंत्री काँग्रेस आनी मिझो नॅशनल फ्रंटाचे आसात. लालदुहोमा हे पयलेच दुसऱ्या पक्षाचे मुख्यमंत्री.
लालदुहोमा हांचो जल्म २२ फेब्रुवारी १९४९ दिसा जाला. तांचे बापूय शेतकार. १९७२ त राज्याचे पयले मुख्यमंत्री सी. छुंगा हांणी तांकां आपले खाजगी सचिव म्हूण नेमले. ह्या काळांत रातशाळेंत शिकून तांणी डिस्टिंक्शनांत पदवी पुराय केली. मागीर तांणी आयपीएसाची परिक्षा दिली. भारतीय पुलीस सेवे खाला (आयपीएस) १९७७ त तांणी गोंयांत नोकरेक सुरवात केली. ही तांची पयली सरकारी नोकरी. १९८२ मेरेन ते हांगा आशिल्ले. पणजे पाट्यार रावताले. ते पयलीं उपविभागीय पुलीस अधिकारी (सहा. अधिक्षक) आशिल्ले. मागीर तांकां बडटी मेळ्ळी. गोंयांत आसतना तांणी भांगराची तस्करी आनी हेर स्मगलिंगा आड बरें काम केल्लें. गोंयांतल्यान तांची प्रधानमंत्री इंदिरा गांधी हांचे सुरक्षा मुखेली म्हूण नेमणूक जाली.
लालदुहोमा हांणी झोराम पीपल्स मूव्हमेंटांत वांटो घेतलो. १९९७ त झेडपीएम स्थापन जाली. पूण तांकां पक्ष म्हूण २०१९ त मान्यताय मेळ्ळी. २०१९ त तांकां ह्या पक्षाचे मुख्यमंत्री पदाचे उमेदवार म्हूण वेंचून काडले. सप्टेंबर २०२० त सत्ताधारी एमएनएफ पक्षाच्या १२ आमदारांनी तांचे आड अपात्रताय याचिका घाली. अपक्ष उमेदवार म्हूण वेंचून आयिल्ले आसतना ते झेपीएमचे फुडारी जावंक शकना. अपात्रताय कायद्यान (पॅरा २, कलम २) अपक्ष म्हूण वेंचून आयिल्लो उमेदवार वेंचणुके उपरांत दुसऱ्या पक्षांत गेल्यार अपात्र थारू येता, अशें म्हणलां. आपल्या पक्षाची अजून अधिकृत नोंदणी जावंक ना, अशें लालदोहामा हांणी सांगलें. पूण २७ नोव्हेंबर २०२० दिसा तांकां सभापतींनी अपात्र थारायले. देशांतले विधानसभेंतल्यान अपात्र थारपी ते पयले आमदार. पूण १७ एप्रील २०२१ क ते परत वेंचून आयले.
लालदुहोमा ताचे पयलीं १९८४ त काँग्रेसीच्या तिकेटीचेर खासदार जाल्ले. पूण, मागीर पक्ष सोडिल्ल्यान तांचेर कारवाय जाली. पक्षांतर बंदी कायद्या खाला अपात्र थारपी ते देशांतले पयले खासदार. राजीव गांधी हांच्या सांगण्या वयल्यान ते राजकारणांत आयिल्ले. लालदुहोमा हांच्या झेडपीएम पक्षान अंदूं मिझोरामांतल्या ४० जाग्यांतले २७ जिखल्यात. आयज राज्यपाल हरी बाबू कंभामपती हांणी तांकां पदाचो सोपूत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
