गोंयच्या आंब्याक सगळ्यांत चड मागणी युएईंत

भांगरभूंय | प्रतिनिधी

युके, बाहरेनांतय आंब्याक वाडटी मागणी

पणजीः गोंयच्या आब्यांक सगळ्यांत चड मागणी युएई देशांत आसा. राज्यांतल्यान 71 टक्के आंब्याची निर्गत ही युएईच्या देशांत जाता. जाल्यार युएई उपरांत युके देशांत सगळ्यांत चड मागणी गोंयच्या आंब्याक आसा. हे दोनूय देशां सयत 8 देशांनी गोंयच्या आंब्याची निर्गत जाल्या, अशी म्हायती शेतकी आनी प्रसंस्कृत उत्पन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ले आंकडेवारी प्रमाण, अंदूचें अर्थीक वर्स 2025-26 वर्सा एप्रिल ते जुलय ह्या चार म्हयन्यां मजगतीं 45.68 मेट्रीक टन आंब्यांची निर्गत जावन 1.60 लाख युएस डाॅलर म्हणल्यार 1.39 कोटी इतलें मोल फावो जालां.
सगल्यांत चड आंब्याची निर्गत जावपाचे वळेरेंत युएई देश पयले सुवातेर आसात. युएईत 32.45 मेट्रीक टन आंब्याची निर्गत जावन 1.09 कोटी इतलें मोल मेळ्ळां, दुसरे सुवातेर युकेंत 4.03 मेट्रीक टन आंब्याची निर्गत जावन 7 लाख इतलें उत्पन्न मेळ्ळां. तिसरे सुवातेर बाहरेनांत 3.09 मेट्रीक टन आंब्याची निर्गत जावन 9 लाख इतलें मोल आयलां.
जाल्यार कतारात 2.36 मेट्रीक टन आंब्याची निर्गत जावन 6 लाख, इटलींत 2.59 मेट्रीक टन निर्गत जावन 4 लाख, नेदरलेण्डांत 520 किल निर्गत जावन 2 लाख, जर्मनींत 500 किलो निर्गत जावन एक लाख आनी ओमानांत 140 किलो इतली निर्गत जावन एक लाखा परस कमी मोल फावो जालां.
एप्रिल ते मे म्हयन्यांत सरासरी 19 ते 21 मेट्रीक टन आंब्याची निर्गत जाल्या. जून म्हयन्यांत ही निर्गत सामकीच उणी जाल्या. जुलय म्हयन्यांत निर्गत जावंक ना. एप्रिलाचे तुळेंत मे म्हयन्यांत आंब्याची निर्गतींत 2.43 मेट्रीक टन वाड जाल्ली. पुण मोलांत 7 लाख उणाव नोंद जाल्लो. एप्रीलाचे सुरवातेकच युएई, कतार, बाहरेन आनी जर्मीनी देशांतच निर्गत जाल्ली. मे म्हयन्यांत उरिल्या आठ देशांनी निर्गत चालीक लागली.