भांगरभूंय | प्रतिनिधी
पणजीः आयएएस, आयपीएस, आयएफएस आनी गोंय पुलीस तशेंच नागरी सेवेंतले अधिकारी, मामलेदार, बीडीओ हांकां सगळ्यांक रामदेव बाबा दितले योगाचे धडेे. २४ जानेवारीक योगसेतू लागसार सकाळीं ४.३० वरांचेर हाजीर रावपाची सुचोवणी नियोजन आनी सांख्यिकी संचालनालयान परिपत्रका वरवीं दिल्या.
नियोजन, सांख्यिकी आनी मूल्यमापन संचालनालय पतंजली रिसर्च फावंडेशन, हरिद्वार हांच्या जोडपालवान भारत आंतरराष्ट्रीय आयुर्वेद आनी वेलनेस एक्स्पो तशेंच शिखर परिशद २०२६ हाची पयली आवृत्ती घडोवन हाडटले. तीन दिस चलपी ही कार्यावळ २३ जानेवारी २०२६ ते २५ जानेवारी २०२६ ह्या काळांत डॉ. श्यामा प्रसाद मुखर्जी इंडोअर स्टेडियम, बांबोळी, गोंय हांगा जातली.
आयुर्वेद, वेलनेस आनी समग्र भलायकी पद्धतींचो प्रचार करपाचो हेत ह्या एक्स्पो आनी शिखर परिशदेचो आसा. देश-विदेशांतले तज्ञ, संशोधक, वैद्य आनी धोरण निर्माते हे कार्यवळींत एकठांय येवन परंपरीक वैजकी आनी वेलनेस क्षेत्रांतलें ज्ञान, नवकल्पना आनी उत्तम पद्धतींचो आस्पाव हे कार्यावळींत जातलो.
हे कार्यवळीचो एक भाग म्हण परम पुज्य योगऋषी श्री बाबा रामदेव जी हांचें विशेश योग सत्र २५ जानेवारीक सकाळीं ५ वरांचेर योग सेतु लागसार भगवान परशुराम पुतळ्याचे सुवातेर जावपाचे आसा. हें योग सत्र शारीरिक, मानसीक आनी आध्यात्मीक भलयाकी राखपाक योगाचें म्हत्त्व अधोरेखीत करपाचो उद्देश धरून आयोजीत केलां.
हे विशीं आयएस, आयएफएस, आयपीएस, गोंय नागरी सेवेचे वरिश्ठ आनी कनिश्ठ श्रेणी अधिकारी, गोंय पुलीस सेवेचे वरीश्ठ आनी कनिश्ठ श्रेणी अधिकारी, विभागप्रमुख, मामलतदार, संयुक्त मामलतदार, दक्षता अधिकारी आनी गट उदरगत अधिकारी ह्या योग सत्रांत वाटेकार जावपाचे निर्देश संचालनालयान परिपत्रका वरवीं दिल्या.
सगळ्या अधिकार्यांनी फांतोडेर ४.३० वरांचेर सुवातेर आपली हजेरी लावची. योग सत्रा खातीर ड्रेस कोड धवे टी-शर्ट आसतलो. अधिकार्याक सुवातेर धवें टी-शर्ट आनी योगाची शेंदरी दितले. हे आदेश सक्षम प्राधिकरणाच्या मंजुरीन जारी केलोलो आसा, अशें परिपत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
