भांगरभूंय | प्रतिनिधी
जोयडा, खबरां संस्था : फोंडेंच्यान मुंबय वचपी कंटेनरांतल्यान अनमोड अबकारी चेकनाक्याचेर ३ लाख ६६ हजार रुपयांचो गोंय निर्मित सोरो जप्त केला. ह्या प्रकरणांत भवन मुराजी गांधी (रा. नवी मुंबय) हाका अटक केल्या.
हे विशीं चड म्हायती प्रमाण, शेनवारा रातीं गोंयच्या फोंडेंच्यान येवपी एका कंटेनरांतल्यान गोंय निर्मीत सोर्याची तस्करी जातली अशी म्हायती अबकारी विभागाक मेळिल्ली. ते प्रमाण अनमोड हांगा ह्या कंटेनराची तपासणी केली तेन्ना चालकाच्या कॅबिनांत आशिल्ल्या चोर बॉक्सांत सोरो सांपडलो. हातूंत रॉयल ग्रीन व्हिस्की २० बॉक्सां, ओकस्मिथ गोल्ड कंपनीच्या सोर्याचीं १० बॉक्सां सांपडलीं. भवन मुराजी गांधी हांचे कडल्यान २२ लाख रुपयांचें वाहन, बर्जर कंपनीचो सुमार ३ लाख ७५ हजार रुपयांचो पेंट आनी ३ लाख ६६ हजार रुपयांचो सोरो असो सुमार २९ लाख ४१ हजार रुपयांचो माल जप्त केलो.
ही कारवाय अनमोड अबकारी विभागाचे अबकारी निरीक्षक महेंद्र नायक हांच्या मार्गदर्शनाखाला जाली. ह्या वेळार उपनिरीक्षक टी बी मल्लणवर, कर्मचारी श्रीकांत जाधव, दीपक बारामती, महंतेश हुन्नूर, श्रीशैल हडपद, प्रवीण होसकोटी हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
