भांगरभूंय | प्रतिनिधी
गोंयची भाजी, काजू, आंब्यांकय बरीच मागणी
समीप नार्वेंकार, पणजी: गोंयच्या सोर्यांक भायल्या देशांत सगळ्यांत चड मागणी आसा. ह्या अर्थीक वर्सा चार म्हयन्यां भितर २ हजार मेट्रीक टन परस चड सोर्याची आयात जावन सोरो हो पयले वळेरेर आसा. जाल्यार ५८७ मेट्रीक टन सयत भाजी ही दुसरे वळेरेर आसा. तशेंच गोंयच्या काजू आनी आंब्यांक लेगीत विदेशांत बरीच मागणी आसा, अशी म्हायती शेतकी आनी प्रसंस्कृत उत्पन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ले आंकडवारी प्रमाण अंदूचें अर्थीक वर्स २०२५-२६त एप्रिल ते जुलय ह्या चार म्हयन्यां मजगतीं सुमार २८०० मेट्रीक टन इतलें शेतकी उत्पन्न आनी प्रक्रीया केल्ल्या उत्पन्नांची निर्गत जावन ५.९९ अमेरीकन मिलियन डॉलर म्हळ्यार ५० कोटी इतले मोल आयलां. हातूंत सोरो, काजू बी, आंबो, वखदी झाडा, गोड खाणा (कोन्फेक्शनरी) आनी भाजी हांचो आसपाव आसा.
सगळ्यांत चड २०४८ मेट्रीक टन सोर्याची निर्गत गोंयां सावन भायल्या देशांनी जावन २९ मिलीयन युएस डोलर म्हळ्यार २५.२१ कोटी मोल फावो जालां. जाल्यार दुसरे सुवातेर ५८७ मेट्रीक टन भाजी भायल्या देशांत निर्गत जावन १६ मिलीयन युएस डॉलर म्हळ्यार १४.४५ कोटी इतलें मोल आयलां. जाल्यार १०२ काजू बियांची निर्गत जावन १० मिलीयन युएस डॉलर म्हळ्यार ८.६३ कोटी इतले मोल आयलां, जाल्यार ४५ मेट्रीक टन आंब्यांची निर्गत जावन १ मिलीयन युएस डॉलर म्हळ्यार १.३८ कोटी इतलें मोल फावो जालां, अशी म्हायती एपीडा हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
