गोंयचो सुपरस्टार राजदीप नायक

भांगरभूंय | प्रतिनिधी

‘गांव जाला जाण्टो’ ह्या कोंकणी नाटकाचे एकाच दिसा, एकेच सुवातेर सेगीत सात प्रयोग करून संवसारीक विक्रम केल्ल्या कला चेतना – वळवय ह्या संस्थेचे आनी खेरीतपणान अध्यक्ष विठ्ठल नायक, निर्मातो राजदीप नायक, लेखिका सुचिता नार्वेकार, दिग्दर्शक अमोघ बुडकुले, तशेंच सगले कलाकार आनी तंत्रज्ञांक मना-काळजा सावन परबीं. हें येस फकत हे संस्थेचें वा कलाकारांचें न्हय, तर पुराय गोंयचें आसा, अशें आमच्यान म्हणूं येता.
कला चेतना ही संस्था आयज फकत वळवयची उरूंक ना, पुराय गोंयची जाल्या. सगल्यांनी हे संस्थेक, संस्थेच्या कलाकारांक, तांच्या नाटकांक आपणायलां, मोग दिला. ‘गांव जाला जाण्टो’ ह्या नाटकाचे देश-विदेशांत प्रयोग जातात. ह्या पंगडान गोंयचें नांव खूब वयर हाडलां. फुडाराक आनीक बऱ्यो कलाकृती हाडून आनीकूय विक्रम घडयतले हातूंत दुबाव ना. कला चेतना वळवयच्या ह्या प्रवासाची सुरवात करपी राजदीप नायकाच्या दूरदृष्टीक लागून आयज गोंय खऱ्या अर्थान कलाकारांची खण म्हूण मुखार येवपाक लागल्या.
गीत, संगीत, चित्रपटाच्या मळार भारतीय सिनेसृष्टीक गोंयान बरे कलाकार दिल्यात. फाटलीं कितलींशीच वर्सां आमी आयकतात, वाचतात की गोंय ही कलाकारांची खण आसा म्हूण. लोककला, चित्रकला आनी हेर कलांच्या मळारूय गोंयचें खूब मोलादीक योगदान आसा. गोंयचीं तियात्रां तर संवसारभर फामाद आसात. जंय गोंयकार पावला थंय तियात्र पावलां. ह्यान फुडें जंय गोंयकार पावला थंय कला चेतना संस्था पावल्या, राजदीप पावला म्हूण पळोवपाक मेळटलें हातूंत मात्तूय दुबाव ना.
1998 वर्सा कलाचेतना वळवयची स्थापना जाली. त्या वेळार राजदीपाक खरी साथ दिली ती ताच्या वांगडच्यांनी, ताच्या इश्टांनी. ‘एक आनी एक इकरा’ अशी एक म्हण आसा. ती खरी करून दाखयतना राजदीपाक ताच्या इश्टांनी साथ दिवन हे संस्थे वरवीं एकापरस एक बरीं नाटकां गोंयकारां मुखार हाडलीं. 1998 त घडये राजदीपान गोंयाक कोंकणी नाटकां म्हणल्यार कितें तें दाखोवन दितना पुंडलीक नायक हांणी बरयिल्लें ‘चक्राचक्री’ हाडलें. चवथी निमतान हाडिल्ल्या ह्या नाटकाक बरो प्रतिसाद मेळ्ळो. मात, राजदीपाच्या सुपरस्टार प्रवासाची सुरवात पुंडलीक नायक लिखीत आनीक एक नाटक ‘शिरी रे शिरी… अधांतरी’ ह्या नाटकान जाली. 1999 वर्सा आयिल्ल्या ह्या नाटकान गोंयभर धुमाकूळ घालो. त्यावेळार एखाद्या नाटकाचे 100 प्रयोग जावप म्हणल्यार कठीण गजाल. राजदीपान त्या वेळार जबरदस्त मेहनत घेवन नाटकाचे 100 प्रयोग केले. ह्या नाटकान राजदीपाचो अभिनय पळोवन गोंयाक एक सुपरस्टार मेळ्ळो. फुडें गोंयांत, गोंयची चित्रपट सृश्टी जाली जाल्यार हो निश्चीतच सुपरस्टार जातलो, अशें म्हाका तरी दिशिल्लें. राजदीपाचो अभिनय पुराय गोंयाक आवडलो. ते पयलीं गांवांनी मराठी नाटकां जातालीं. गांवचीं भुरगींच बसयतालीं. आमी तीं हौशी नाटकां म्हूण वळखतालीं, तशेंच आपल्याच गांवचीं भुरगीं म्हूण गांवचो लोक उमेदीन पळयतालो.
मात, कांय भायलीं नाटकां येतालीं, तीं पळोवन गोंयांत अशीं नाटकां केन्ना तयार जातलीं म्हूण जाका -ताका दिसतालें. राजदीपान हो उणाव भरून काडटना,
पुणे- मुंबयकारांच्या दर्जाचीं नाटकां
हाडलीं.
2000 वर्सा श्रीधर कामत बांबोळकार हांणी बरयिल्लें ‘दोन कुळां, दोन खुळां’ ह्या नाटकाकूय जबरदस्त येस मेळ्ळें. ह्या नाटकाचे 86 प्रयोग जाले. त्या वेळार इतले प्रयोग जावप म्हणल्यार खूब व्हड गजाल. अंता घरा भगवंता (2001) नाटकाचेय 91 प्रयोग जाले. 2002 त आयिल्ल्या राजदीपाच्या ‘कांसुलो’ नाटकान मात कला चेतना वळवयक घराघरांत पावयलें. त्या वेळार सीडीचो काळ आयिल्लो. राजदीपान काळा प्रमाण चलतना ‘कांसुलो’ची सीडीय काडली. तशेंच ह्या नाटकाचे 126 प्रयोगूय जाले. सीडी वरवीं राजदीप घराघरांत पावलो. जांकां ताचें नाटक पळोवंक मेळूंक ना, राजदीप म्हणल्यार कोण तें खबर नाशिल्लें, तांकां कळ्ळें की गोंयचो स्वताचो एक सुपरस्टार कलाकार आसा, जो कोंकणी खातीर वावुरता, कोंकणींत नाटकां करता.
राजदीपाक ह्या प्रवासांत ताची इश्टीण, घरकान्न सुचिता नार्वेकार हांचीय मोलादीक साथ मेळ्ळी. प्रत्येक येसस्वी दादल्या फाटल्यान एक बायल
आसता अशें म्हणटात. मात, हांगां एकामेकाच्या सांगातान दोगांयनी कोंकणीची सेवा करतना इतिहास रचलो. गोंयाक गोंयचीं नाटकां दिलीं. राजदीपाच्या ह्या नाटकां पसून प्रेरणा घेत राज्यांत हेर सुवातांचेरूय कोंकणी नाटकांची व्हड प्रमाणांत निर्मिती जावपाक लागली. आतांय जाता.
2003 त ‘धनया देवचारां’ नाटक आयलें, ताचे 16 प्रयोग जाले, कांय तंत्रीक कारणांक लागून फुडें आनीक प्रयोग जावंक नात. मात, ह्या नाटकाक प्रेक्षकांचो बरो प्रतिसाद मेळ्ळो. ह्याच वर्सा तिरंगी चक्राचक्री नाटक परत हाडलें आनी ताचे 80 प्रयोग जालें. 2004 त राजदीपान व्हड धमाको करतना ‘मिक्सींग फिक्सींग’ हें अफलातून नाटक हाडलें. राजदीपान हातूंत सात वेगवेगळ्यो भुमिका करतना आपली अभिनय तांक दाखोवन दिली. ह्या नाटकाचे 259 प्रयोग जाले.
आमी ते आमी (2005, 135 प्रयोग), राव राव बाबुराव (2005, 78 प्रयोग), घुमचे कटर घुम (2006, 96 प्रयोग), आमी ते ब्रह्मचारी (2006, 104 प्रयोग), मनी मनी चिंतामणी (2006, 102 प्रयोग), बिंदास रामदास (2007, 135 प्रयोग), अण्णाक कोण ना (2007, 109 प्रयोग), डबल ट्रबल (2007, 106 प्रयोग), ओ बाय (2008, 200 प्रयोग), ए गणपत (2008, 125 प्रयोग), आमी येता रे (2008, 103 प्रयोग), मम्मी ओ मम्मी (2009, 135 प्रयोग), 3 इडियट्स (2010, 160 प्रयोग), फिरंगी फटास (2011, 160 प्रयोग), आंकवार कंपनी (2011, 173 प्रयोग), कामा पुरतो मामा (2012), होम मिनिस्टर (2013, 110 प्रयोग), आरत्याक परतें (2014, 118 प्रयोग), आता माझी सटकली (2015, 100 प्रयोग), परतून फिरंगी फटास (2016, 107 प्रयोग), जोडी नंबर 1 (2017, 115 प्रयोग), अ पूर्ण लव्ह स्टोरी (2018, 248 प्रयोग), म्युझिकल कांसुलो रिटर्न्स (2019), भिवपाची गरज ना (2021), काणी नव्या युगाची (2022, 152 प्रयोग), सेम टू सेम (2023) अशी एकापरस एक नाटकां कला चेतना वळवयन हाडली. हांगां जितलीं नांवां दिल्या ती सोडून आनीकूय खूब नाटकां ह्या संस्थेन केल्यात. सगल्यांची नांवां हांवें बरोवंक ना.
कला चेतना वळयन फकत नाटकांच केल्यात अशें न्हय ‘ते सात दीस – शॉर्ट स्टोरीज कलॅक्शनूय केलां. नाट्य महोत्सव आयोजीत केले. भुरग्यां खातीर कार्यशाळा घेतल्यात. आयज, कितलेशेच कलाकार हे संस्थेच्या माध्यमांतल्यान लोकां मुखार आयल्यात. चेतना प्रॉडक्शनाचे वतीन एक जबरदस्त फिल्मूय तयार केलां. हें फिल्म दिव्यदृष्टी (दिश्टी पडना ते) आशिल्ल्यां खातीर गोंयचें पयलें फिल्म आशिल्लें. गोंय ही नाट्यभुमी. गोंयकार हो खरो कलाकार, गोंय कलाकारांची खाण आसा हें वळखून राजदीपान 27 वर्सां पयलीं रोयिल्लें झाड आयज वड जाला. वडाक जशी वयोमर्यादा ना, तशीं हे संस्थेकूय आसचीना, इतले कलाकार ह्या संस्थेंतल्यान घडत आसा. फुडेंय घडत रावतले.
राजदीपान नाटकां बरोबर चित्रपटानूय काम केलां. कांसुलो आनी मिक्सींग फिक्सींगाच्या व्हीसीडीच्या माध्यमांतल्यान राजदीप गोंयच्या घरांघरांत पाविल्लोच, मात ‘होम स्विट होम’ चित्रपटाच्या माध्यमांतल्यान राजदीप सगल्यांच्या मनां-काळजांत पावलो. ह्या चित्रपटान ताणें केल्लो अभिनय जबरदस्त आशिल्लो. ह्या चित्रपटाचो दुसरो भागूय आयलो, तोवूय लोकांक खूब आवडलो. ‘कॅस्तांव दे कोफुसांव’ चित्रपटान राजदीपान आपूण खंयच्याय तरेचो अभिनय सहज करपाक शकता हें दाखोवन दिलें. ताणें आनीकूय कांय चित्रपटांत अभिनय
केलो. मात, रंगभूमी ताचो पयलो मोग. कोंकणी नाटकांची निर्मिती करप, तातूंत अभिनय करप, त्या बरोबरच कोंकणीची सेवा अशें सगलें करीत राजदीप फुडें आयलां.
‘गांव जाला जाण्टो’ ह्या नाटकाच्या माध्यमांतल्यान राजदीप आतां जंय गोंयकार आसा थंय पावपाक लागला. फुडेंय ह्या नाटकाचे खूब प्रयोग जातले. संवसारीक विक्रम रचिल्ल्या ह्या नाटकाचें संवसार भर प्रयोग जातलें, हातूंत मात्तूय दुबाव ना.

अमर पाटील