भांगरभूंय | प्रतिनिधी
बाबत सुविधेक लागून पर्यटकांक वायट अणभवः वेवसायीक
पणजी, समीप नार्वेंकार : गोंयचो वॉटर स्पोर्ट्स भायल्यांनी हायजॅक केला आनी ते पर्यटकांक बाबत सुविधे सयत कसलीच सुरक्षा नासतना वॉटर स्पोर्ट्स करतात. हाका लागून पर्यटक वायट अणभव घेवन वतात. हातूंत गोंयचें नांव पेड्ड्यार जाता. इतलें जावन लेगीत प्रशासनान सामकीच आडनदर केल्या, असो आरोप थळाव्या टुर आॅपरेटरांनी केला.
आयतारा सांजवेळार बायणा दर्यात पॅरासेलींग करतना एका पर्यटकाक अचकीत मरण आयिल्ले. हे घडणुके वेल्यान वॉटर स्पोर्ट्स आयोजनातलें घाळपण उक्तडार आयलें. हे घडणुकेचेर टुर आॅपरेटर्सांनी चिंता उक्तायला. गोंयकारांनी हो धंदो आतां भायलांच्या हातांत घाल्ल्यान वॉटर स्पोर्ट्सांचो दर्जो देंवत चल्ला. हातूंत गोंयकारांचें लुकसाण जालांच ते भायर गोंयचें नांवूय पेड्डेर जालां.
हे विशीं उलयतांना कळंगुटचे टुर आॅपरेटर फोंडू आश्वेकार हांणी सांगलें, ज्या पर्यटकांक वॉटर स्पोर्टस अणभवपाक जाय तांकां कॉम्बो पॅकेज दितात. तातुंत जेट स्की, बनाना रायड, पॅरासेलींग, स्कुबा डायव्हींग हे सारकिल्ल्यो गजाली आसतांत. हे बाराबर तांकां नाश्तो, जेवण, थंड पेय आनी बियरी दितात. पळोवपाक गेल्यार प्रमाणपत्र आशिल्ले स्कुबा डायव्हींग 6 ते 7 हजारांक पडटा. जाल्यार स्कुबा डायव्हींग सयत हेर वॉटर स्पोर्टस 800 ते 1000 रुपयां भितर करतात. आॅपरेटरांक खऱ्यांनीच हो खर्च परवडना, पुण खर्च भागोवपा खातीर दर्ज्याकडे तडजोड जाता, असो आरोप आश्वेकार हांणी केलो.
ताकीं परस बोटींत चड पर्यटक
हो खर्च वसूल करपा खातीर हे भायले लोक 35 लोकांची तांक आशिल्ले बोटींत सुरक्षा नेम फाट्यार मारीत 70 पर्यटक भरतात. नाश्त्यांक फक्त पॅटीस दितात. ग्रँड जुंवें ही नौदळाची मालमत्ता. थंय सामान्य लोकांक येवपाक निर्बंध आसात आनी ग्रँड जुंवें सांगून तांकां बॅट जुंव्याचेर व्हरतात. जेवण सकाळचें रांदिल्लें आसता. दनपार मेरेन तें कांय वेळार बेळशेंता. तें जेवले उपरांत बोटींत प्रवास करतना पर्यटकांच्या पोटांत धवळटा आनी ते दुयेंत पडटात. तांची मजा- सजा जावन रावता, अशी म्हायती आश्वेकार हांणी दिली.
ह्या जुंव्यार 15- 20 मिण्टां खातीर स्कुबा डायव्हींग करतले अशें पयलीं सांगतात. पुण फक्त 15 ते 20 सेकंदूच हें डायव्हींग चलता. आॅक्सिजनाचे रेग्युलेटर तांचे हातांत आसता ते वेळ थारयतात आनी तुमी फिट नात हें कारण सांगतात. उपरांत बायणा, बोगमाळो वा दोना पावला दर्यादेगेर वॉटर स्पोर्टसां खातीर व्हरतात. ते खातीर ते बारीक बोटी हाडटांत. पुण उबे रावपाकूय भितर सुवात नासता, अशें आश्वेकार हांणी सांगलें.
90 टक्के वेवसायीक भायले
कॅप्टन आॅफ पोर्ट खात्यान बोटीच्या प्रवाश्यांचे क्षमतेचेर लक्ष दवरपाक जाय, तट रक्षक दळान बेकायदेशीर घडणुकेचेर नदर दवरपाक जाय आनी पर्यटन खात्यान खर्चाचें नियंत्रण पळोवपांक जाय. पुण ह्या तिगांकूय कितें चलता तें खबर लेगीत नासता. देखून फाटलीं 5- 6 वर्सां हो वेवसाय बाबत जायत चल्ला, असो आरोप आश्वेकार हांणी केलो.
जाल्यार फर्नांडीस टूर आनी ट्रॅव्हल्सचे धनी पॉल फर्नांडीस हांणी सांगलें, गोंयकारांनी हो वॉटर स्पोर्टसाचो धंदो काडून भायल्यांच्या हातांत दिला आनी आतां तो 90 टक्के युपी, बिहार आनी कर्नाटकाचे लोक चलयतात. कोबो बीच आनी पणजे फक्त 4 ते 5 गोंयकार उरल्यात, जे हो धंदो करतात. हांचे कडे बोटी चलोवपांक लायसेन्स नासता तशेंच पर्यटन खात्याची मान्यताय नासता. फक्त फटीची म्हायती दिवन पर्यटकांची दिशाभूल करतात आनी उपरांत तांचे कडल्या पयशे काडटात. जर विदेशी पर्यटक आयल्यार तांकां तांचें इंग्लिशेंत नांव लेगीत बरोवपांक येना. विदेशी पर्यटक हाचो वायट अणभव घेता आनी हाका लागून गोंयच्या पर्यटनाचो विध्वंस जायत आसा, अशे फर्नांडीस म्हणटा.
कोणाक प्रशिक्षण ना
हे जे वॉटर स्पोर्टस धंदो करतात, तांकां कसलेंच प्रशिक्षण नासता. फक्त प्रशिक्षकाक गिन्यान आसता, पुण हे सहाय्यक फक्त दिसवड्याचें मानाय कशे काम करतात. कांय म्हयन्या पयलीं स्कुबा डायव्हींग प्रशिक्षक बुडिल्लो. ताका भायर काडप कशें हेर बाकीच्या मानयांक खबर नासलें. जर ह्या जाग्यार पर्यटक आशिल्लो जाल्यार कितें जावपाचें ताचो विचार करचो, असो प्रश्न फर्नांडीस हांणी केलो.
वॉटर स्पोर्टस करतलो जाल्यार तांकां प्रशिक्षण आसपाक जाय. भायल्या लोकांक कसलेंच प्रशिक्षण ना आनी ते पर्यटकांक शिकयतात. पयलीं हजार रुपया सवाय भितर सांगून गिरायक व्हरतात. उपरांत वॉटर स्पोर्ट्स करपा खातीर हेर अटी घालून तांचे कडल्यान पयशे उकळटात आनी तांचें साधता. जेन्ना गोंयकार हे धंदे चलयताले तेन्ना पर्यटक तांकां सलाम मारताले. गोंयकारांनी आपल्यो बोटी भाड्याक दिवचे परस त्यो स्वता चलोवच्यो, असो उलो फर्नांडीस हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
