भांगरभूंय | प्रतिनिधी
पणजी: गोंयच्या ‘ऍक्ट टू अचिव्ह’ ह्या लघुपटाची जपानांतल्या रायझिंग सिनेमा फिल्म फेस्टिव्हला खातीर सेमी-फायनलिस्ट म्हणून निवड जाल्या. हो फिल्म फेस्टिव्हल जपानांतल्या ओसाका शारांत जावपाचो आसा. ही निवड गोव्याच्या चित्रपटसृष्टी खातीर आनी हांगच्या नवोदित फिल्ममेकरां खातीर आंतरराष्ट्रीय पांवड्यार एक फार मोलाची कामगिरी जाल्या.
रायझिंग सिनेमा फिल्म फेस्टिव्हल हो नव्या पिळगेचो आंतरराष्ट्रीय फिल्म फेस्टिव्हल आसा, जो उदयोन्मुख दिग्दर्शक आनी कथा सांगपी कलाकारांक सोदपाक समर्पीत आसा. फिल्म क्लब जपान ह्यांच्या आयोजना खाला जावपी हो फेस्टिव्हल जपानी तत्त्वज्ञान कायझेन (सतत सुधारणा) ह्या संकल्पनेचेर आदारीत आसा. हे माचयेर फिल्ममेकर एकठांय येतात, सहकार्यांत वाडतात, सर्जनशील रितीन विकसीत जातात आनी आपल्या चित्रपट प्रवासाच्या प्रत्येक टप्प्याचो उत्सव साजरो करतात.
ह्या फेस्टिव्हलान तोई स्टुडिओज, शोचिकू स्टुडिओज, आनी क्योटो फिल्ममेकर्स लॅब अश्या नामनेच्या संस्थां कडेन सहकार्य केलां. तशेंच हॉलीवूडचो प्रसिद्ध दिग्दर्शक डेव्हिड एफ. सँडबर्ग हांणी ह्या फेस्टिव्हलाक मान्यता दिल्या.
‘ऍक्ट टू अचिव्ह’ हो पर्यावरण विशयाचेर आधारीत लघुपट आसा. जो गोंयच्या लोटले गांवांतल्या जेन-झेड दिग्दर्शक मारियो पिमेंटो हांणी दिग्दर्शीत केला. हो चित्रपट हवामान बदलाच्या प्रस्नारर लक्ष केंद्रीत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
