भांगरभूंय | प्रतिनिधी
संघटणेन उक्तायलो विस्वा; 13 खेळगड्यांचो आस्पाव
म्हापशें: अंदूंच्या राष्ट्रीय खेळां सर्ती खातीर गोंय एमेचर बॉक्सींग असोसिएशन आशावादी आसा. गोंयचो पंगड बॉक्सिंगेंत ह्या वेळार बरी कामगिरी करतलो आनी उण्यांत उणीं चार ते पांच भांगरा पदकां मेळयतलो असो विस्वास संघटणेन उक्तायला. गोंयच्या बॉक्सींग पंगडांत 13 खेळगड्यांचो आस्पाव आसून 7 दादले आनी 6 बायलां बॉक्सर आसात.
सोमारा सांजवेळा पेडें-म्हापश्यां भाऊसायब बांदोडकार खेळां संकुलांतल्या बॉक्सींग मैदानार आयोजीत केल्ले पत्रकार परिशदेंत संघटणेचे अध्यक्ष फ्रँकी व्हिएगश, कार्यकारी अध्यक्ष निनील डिसोझा, भांडारी धनुष्का दिगामा आनी हेर पदाधिकारी आनी खेळगडे हाजीर आशिल्ले.
अध्यक्ष फ्रँकी व्हिएगशान म्हणलें, गोंय बॉक्सींग पंगड खेळां सर्ती खातीर पुरायेन तयार आसा. फाटल्या तीन म्हयन्यांच्या राबितो शिबिरांत आमच्या खेळगड्यांनी बरें प्रशिक्षण आनी खर कश्ट घेतल्यात. प्रशिक्षक तशेंच खेळां विज्ञान वेवसायिकां कडल्यान मेळिल्ल्या ह्या प्रशिक्षणांतल्यान खेळगड्यांक कुशळटाय, फिटनेस आनी मानसीक भलायकी सुदारपा खातीर खूबशी मजत जाली. ताचें फळ सर्तींतल्यान गोंयच्या बॉक्सरां कडल्यान पदाच्या स्वरुपांत पळोवंक मेळटलें.
राबितो शिबिरा बरोबरूच बॉक्सरांक राज्या भायर शिबिराचें आयोजन केल्लें. थंय लेगीत खेळगड्यांनी डावपेच आनी कामगिरी सुदारपा खातीर मजत मेळ्ळी अशें तांणी म्हणलें.
राष्ट्रीय खेळां सर्तींतल्या बॉक्सरां मदीं 51 कील ते 92 की गटांत दादले आनी बायलां बॉक्सरांनी वांटो घेतला. हातूंत एके रोशनजमीर (51 कील), प्रल्हाद हरिकृष्णा पांडा (57 कील), आकाश रमेश गोरखा (63.5 कील), रजत (71 कील), लोकेश (80 कील), आयुष साई (92 कील), गौरव चौहान (92 कील). जाल्यार, एलिना अजीर इजिदोर (57 कील), निहारिका श्रीराम गोनिला (63.5 कील), श्रीशा भास्कर जम्पुला (66 कील), सानामाचा चानू (75 कील).
ह्या पंगडाचे प्रशिक्षक म्हूण निलेश कानोळकार, चितमबरम नायक, संतोष भिरमोले, वेलंकी धुमस्कार, मदन लाल आसतले. जाल्यार सरफराज हुसैन पंगडाचे वेवस्थापक आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
