भांगरभूंय | प्रतिनिधी
सुपुल्ल्या गोंयांत एका फाटोफाट एक गुन्यांव जायत आसात. काल एक खून जालो. जमनीच्या वादांतल्यान मोरजेंतल्या वयल्या वाड्यार रावपी उमाकांत खोत ह्या कुळाक मारपेटांत मरण येवपाची घडणूक घडली. कांय कामगारां कडल्यान हें जालां, असो दुबाव आसा. तपासा उपरांत सत्य कितें तें उक्तडार येतलेंच. मात, जें कितें जालां तें गोंयकारांक धक्को दिवपी आसा. मोरजेच्या गांवकाराचो खून जावपाचो हो पयलोच प्रकार. पुलिसांनी दोंगर कापपी 14 कामगारांक ताब्यांत घेतल्यात. केस्तांव जावन हें घडलें काय तांकां कोणें हें करपाक सांगिल्लें, ताचेरूय उजवाड पडटलो. खोत हांणी जमनी विशीं आरटीआय, लेखी कागाळी केल्ल्यो. आपली कुळाची जमीन भायल्यांच्या ताब्यांत वचपा पसून आडावपाचो ते कायदेशीर यत्न करताले. म्हणटकच ते समाजवावुरपीच जाले. देखून हे घडणुके फाटल्यान जमीन विकपी वा ती विकत घेवपी आसपाक शकता, असो दुबाव कोणे उक्तायला जाल्यार तिडक येवपाचें कारण ना. हाचे पयलीं राजधानी पणजी शारांत एकल्याक बेल्टांनी बडयला, दुसऱ्या आड पुलिशेंत कागाळी करपाचें सत्र सुरू जालां. ताचे पयलीं पर्वरे एकल्याक लासून मारिल्लो. झूज आनी मोगांत मनीस कितेंय करपाक शकता खंय. तशी जमनी खातीर कितेंय करपाची तयारी आतां कांय अपुरबुद्द गोंयकारांनी दवरल्या. जमीन विक्री आड आवाज काडपी खोता सारक्यांचो जीव गेला. हें सगलें भयानक आसा, सरकारी यंत्रणांनी दावें ओडलें ना जाल्यार गोंयचो बिहार जावपाक वेळ लागचो ना! सध्या सुरवात जाल्या.
कुळांची अर्दी जमीन भाटकारान परस्पर विकली. कारण कोट्यांनी रुपयांचें मोल. जमीन विकचे बदला ती फुडल्या पिळग्यां खातीर राखून दवरुया. दोंगर बेकायदेशीर कापप चल्लां, रस्तो केला, तोय आमचेच जमनींत असो दावो खोत हांणी थळाव्या बातमीदारां कडेन केल्लो खंय. बांदकाम चालू आशिल्ल्या जाग्यार टीसीपी आनी पंचायतीन सगले परवाने दिल्यात असो फलक आसा. खोत हांच्या घरच्यांच्या मतान, टीसीपी, पंचायती कडेन साबार फावटी लेखी कागाळी केल्ल्यो. पूण कारवाय जाली ना. दोंगर कापतात, थंय प्रत्यक्ष वचून खोत विरोध करताले, तातूंतल्यान हो प्रकार घडला आसतलो, अशें सध्या तरी दिसता.
35- 40 वर्सां पयलीं घरां बांदपाचें ल्हार आयिल्लें, तशें गोंयांत आतां जमनी विकपाचें, व्हडले प्रकल्प बांदपाचें ल्हार आयलां. गोंयकार धडाधड जमनी विकीत सुटल्यात. जाणकारांच्या मतान, कांय सरकारीं खातीं, कोमुनिदादीय हातूंत आसात. ह्यो जमनी विकपी, विकत घेवपी कोण, ते कोणाचे सोयरे वावुरपी ताचो सोद घेतल्यार सत्य सोभेमाजार येतलें. बरें, स्वताच्यो जमनी विकता ते विकतात, लोकांच्यो जमनीय बोगस कागदां करून विकपाचे प्रकार घडल्यात. काम- धंदो करिनासतना थोडे रातयां ओगीच अब्जाधीश जावंक नात! ‘गोंय पावणेर काडलां’ अशी सध्याची परिस्थिती,अशें म्हणल्यार ती अतिताय थारची ना. उजो पेटलो काय तो पातळत वता, तशें हे जमनी खायरे आतां दोंगर, रानांनी पावल्यात. देव, देवचारांक पसून तांणी सोडूंक नात! थळाव्यांच्या मतान, मोरजे वाठारांत बावन्सर वाडल्यात. जमनी, दोंगर भायल्यांनी विकत घेतिल्ल्याचें दिसता. सगल्याक चिऱ्यांचीं, सरयांची दुरगां उबीं जाल्यांत. जो कोण विरोध करता, आवाज काडटा तांकां ओगी करपाचेय यत्न चल्ल्यात. कोट्यांनी रुपया मेळटा, म्हूण थळावे लोक जमनी विकत सुटल्यात. तशीच दवरल्यार कुळांक मेळटली, घरच्यां मदीं वांटे जातले, हेंवूय ताचे फाटलें कारण आसतलें.
जमीन धनी वा समाजसंस्थेचेर चेंपण घालुनय जमनी भायल्यांक लाटपाचेय प्रकार घडल्यात आसतले. कांय जाण आॅर्डरली जाल्यात, म्हणजे अधिकाऱ्याची सेवा करपी नोकर. कोण साव, कोण चोर तेंय कळना जालां. खंय व्हरून दवरतले आमचें गोंय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
