भांगरभूंय | प्रतिनिधी
मुख्यमंत्रीः लुपीन ह्युमन वेल्फेर आनी रिसर्च फांवडेशन सीएसआर टायम्स पुरस्कारान सन्मानीत
भांगरभूंय । प्रतिनिधी
पणजीः स्वयंपूर्ण गोंय अंतर्गत सीएसआर उपक्रमा वरवीं गोंय सरकार मुळाव्यो सुविधा, भलायकी, शिक्षण आनी पर्यावरण मळार घटसाण दिवपाक मजत करता. गोंयचे दर्यादेगेंक धोको निर्माण जाला देखून सीएसआर वरवीं पर्यावरण शास्वताये कडेन लक्ष दिवचे. गोंयचो फुडार पाचवोचार करपा खातीर उपक्रम हातांत घेयात, असो उलो मुख्यमंत्री डॉ. प्रमोद सावंत हांणी मारलो.
लुपीन ह्युमन वेल्फेर आनी रिसर्च फांवडेशन हे फार्मा कंपनीक अंदूंचो सीएसआर टायम्स पुरस्कार 2024 फावो जालो. भेद्य समुदाया खातीर शास्वत उपजिवीका उपाय येवजण ह्या प्रकल्पा खातीर लुपीन हांकां भांगराळो करंडक फावो जालो. मुख्यमंत्री डॉ. सावंत हांचे हस्तुकीं तांकां हो पुरस्कार भेटयलो.
सीएसआर टायम्स हांणी गोंय सीएसआर प्राधिकरणाच्या जोडपालवान राज भवनांतल्या दरबार हॉलांत 11 वे सीएसआर टायम्स पुरस्कार आनी सीएसआर परिशद घडोवन हाडली.
शुक्रारा सकाळीं राज्यसभा खासदार सदानंद शेट तानावडे हांचे हस्तुकीं परिशदेचें उक्तावण जालें. ह्या वेळार समाज कल्याण मंत्री सुभाष फळदेसाय, सीएसआर लेखक तशेंच विचारवंत भास्कर चटर्जी हजर आसले. सांजवेळार मुख्यमंत्री डॉ. सांवत हांचे हस्तुकीं पुरस्कार भेटोवपाचे सुवाळो जालो.
शिक्षण, भलायकी, पर्यावरण आनी शास्वत उदरगत ध्येय मळार सीएसआर उपक्रमा वरवी गोंय एक बरें थळ जावचें. ज्या आस्थापनांक आयज पुरस्कार मेळ्ळा तांचो आदर्श दुसऱ्यांनीय घेवचो, अशें मुख्यमंत्री प्रमोद सावंत हांणी सांगलें.
लुपीन मागास आनी उपेक्षीत आशिल्ल्या समुदाया खातीर रोजगार निर्माण करपाचें काम करता. दिसवाड्याचें काम तशेंच तांकां स्वंय रोजगार दिवपा खातीर तांकां टूलकीट दिता आनी स्वताचो वेवसाय उबो करपाक लेगीत तेंको दिता, अशे लुपीन ह्युमन वेल्फेर आनी रिसर्च फांवडेशनचे वरिश्ठ वेवस्थापक अनील गुप्ता हांणी सांगले.
शेतकी आनी ताच्या संबंदीत हेर उपक्रमांत तांकां आमी प्रशिक्षण दितात. तशेंच बऱ्या दर्जाचे बीं दिवन तांकां गांयडोळ सारें तयार करपाक उर्बा दितात. पशुपालना खातीर उर्बा दिवन तांकां बोकडां आनी कोंबेयो पोसपा खातीर मजत करून तांच्या पोटापाण्याची उदरगत करतात, अशें गुप्ता हांणी सांगलें. फाटलीं 35 वर्सां जालीं आमी उपजिवीका मळार काम करतात आनी गोंयांत आमकां 11 वर्सां जाल्यात. गरिबांतल्या गरीब कुटुंबाची उपजिवीकेची उदगरत करपा खातीर आमी यत्न करतात. सीएसआर टायम्स हांणी आमची निवड केल्ले खातीर आमी उपकारी आसात, अशें गुप्ता हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
