गोंयचो इतिहास नाटकांतल्यान मांडचो

भांगरभूंय | प्रतिनिधी

राजेंद्र आर्लेकारः नागेश महालक्ष्मी नाट्य समाजाचें अमृत महोत्सवी वर्स

भांगरभूंय । प्रतिनिधी

फोंडें: अंत्रूज म्हालांतल्या कलाकारांनी विवीध मळाचेर प्राविण्य मेळयलां. नाटकाच्या माध्यमांतल्यान समाज प्रबोधन करतना कलाकारांनी गोंयचो इतिहास नाटकाच्या माध्यमांतल्यान युवा पिळगे मेरेन पावोवपाचो यत्न करचो, असो उलो हिमाचल प्रदेशाचे राज्यपाल राजेंद्र आर्लेकार हांणी मारलो.

बांदोडेंच्या नागेश महालक्ष्मी प्रासादीक नाट्य समाजाच्या अमृत महोत्सवी वर्सा निमतान आयोजीत केल्ले कार्यावळीत राज्यपाल आर्लेकार उलयताले. ही कार्यावळ फोंडेंच्या राजीव गांधी कलामंदिराच्या सभाघरांत आयोजीत केल्ली. ह्या वेळार वीजमंत्री सुदिन ढवळीकार, सिने अभिनेत्री मृणाल कुलकर्णी, मधूलिंगनागेश राजेंद्र वडियार (राजे सौंदेकार), नागेश संस्थानाचे अध्यक्ष दामोदर भाटकार, संस्थेचे अध्यक्ष अजीत केरकार आनी सचीव अरूण काळे माचयेर हाजीर आशिल्ले.

मंत्री ढवळीकार हांणी सांगलें, नागेश महालक्ष्मी प्रासादीक नाटय संस्थेन 75 वर्सां पुराय करतना प्रेक्षकांक दर्जेदार नाटकां दिल्यांत. दरेका कलाकाराच्या दर्जेदार कामाक लागून संस्थेची वाटचाल व्हड वडाच्या रुखाच्या रुपांत साकार जाल्या.

मृणाल कुलकर्णी हांणी सांगलें, गोंयचे कलाकारांचे भुंयेंत नवे कलाकार घडोवचे खातीर नागेश महालक्ष्मी प्रासादीक नाट्य संस्थेन व्हड योगदान दिलां. कलाकारांचे एकवटीक लागून संस्थेचो वावर अदीक कवतुकाचो जाला. ह्या वेळार संस्थे वतीन 20 कलाकारांचो शाल, नाल्ल आनी यादस्तीक चिन्न दिवन मानेस्तां हस्तुकीं सत्कार केलो. अजीत केरकार हांणी येवकार दिलो, अशोक नायक हांणी सुत्रसंचालन केलें जाल्यार अरूण काळे हांणी उपकार मानले.