गोंयचे 50 वयर पर्यटक श्रीनगरांत उरल्यात आडकून

भांगरभूंय | प्रतिनिधी

श्रीनगर : पहलगामांत जाल्ल्या भिरांकूळ आतंकवादी हल्ल्याक लागून जम्मू- काश्मीरांत सुटयेंत गेल्ले गोंयचे 50 परस चड लोक श्रीनगरांतल्या हॉटेलांनी आडकल्यात. तांकां परत हाडपाचे यत्न चालू आसात अशें सरकारी अधिकाऱ्यांनी सांगलें.
दक्षीण काश्मीरांतल्या पहलगामांत आतंकवाद्यांनी पर्यटनाचे मुखेल सुवातेर हल्लो करून उण्यांत उणे 26 जाणांक मारले. खाणां- जेवणाच्या दुकानां भोंवतणी जेवपी, घोड्याचेर बसून वचपी वा पहलगामांतल्या बैसारन देंगणांत गेल्ल्या पर्यटकांचेर आतंकवाद्यांनी फारपेट केलो. हो वाठार ‘मिनी स्वित्झर्लंड’ ह्या नांवान प्रसिद्ध आसा.
हे घडणुके उपरांत सगल्या भोंवडेकारांक पहलगाम आनी हेर सुवातीं सावन श्रीनगरांतल्या हॉटेलांनी व्हेल्ल्याची म्हायती गोंय सरकाराच्या एका अधिकाऱ्यान दिली.
सध्या गोंयचे 50 परस चड लोक जम्मू-काश्मीरांत आसात अशें सांगून सगले ‘सुरक्षीत’ आसात, अशें अधिकाऱ्यान सांगलें. तशेंच गोंयचे टूर ऑपरेटर सगल्या पर्यटकांक परत हाडपाची येवजण आंखताले. हो हल्लो जाल्ले सुवातेर जेवणा उपरांत थोडे पर्यटक बैसारण पॉयंटाक भेट दिवपाचे आशिल्ले अशें एका टूर ऑपरेटरान सांगलें.
“ही घडणूक घडली तेन्ना गोंयकारांचो एक पंगड पहलगाम मार्केटांत आशिल्लो, जाल्यार दुसरो सोनामार्गांत आशिल्लो. सध्या सुरक्षीत आसात. तांकां सगळ्यांक परतून श्रीनगरांतल्या एका हॉटेलांत आपयले,’ अशें पणजेंतली टूर कंपनी गोवा अॅडव्हेंचर क्लबाचे सहसंस्थापक अहराज मुल्ला हांणी सांगलें. तांणी 34 जाणांच्या पंगडाची पहलगाम आनी 12 जाणांची जम्मूक भोंवडी करपाची येवजण आंखिल्ली, अशें मुल्ला हांणी सांगलें.

“जम्मूंतले लोक पालसणां कोसळिल्ल्यान आडखून पडल्यात. विमानांनी गर्दी आसा देखून कोणाक थंयच्यान भायर उड्डाण करपाक मेळना. पहलगामाक गेल्लो एक पंगड 17 एप्रीलाक थंय पावलो आनी 24 एप्रीलाक परत येवपाचो आशिल्लो, तांकां बेगोबेग परत हाडपाचे यत्न सुरू आसात अशें मुल्ला हांणी सांगलें.
पणजे लागसारच्या ट्रॅव्हल बग टूर्स अँड ट्रॅव्हल्स हे कंपनीचे धनी दक्षल नायक हांणी सांगलें, जम्मू-काश्मीराक भेट दिवपी 26 जाणांचो पंगड अजूनय थंय आडकून पडला. ते सगळे श्रीनगरांतल्या हॉटेलांनी पावल्यात, तांकां बेगीन परत हाडपाचो आमी यत्न करतात. गोंयच्या पर्यटकांचो पंगड पहलगाम मार्केटांत जेवता आसतना हो हल्लो जालो. मागीर ते बैसारन पॉयंटाक भेट दिवपाचे आशिल्ले. हो पंगड 21 एप्रीलाक गोंयांतल्यान भायर सरलो आनी 26 एप्रीलाक परतून येवपाचो आशिल्लो अशें तांणी सांगलें.
जम्मू-काश्मीरांतल्यान येवपी विमानांत सुवात मेळनाशिल्ल्यान टूर ऑपरेटरांक पर्यटकांक थंयच्या हॉटेलांनी दवरचे पडल्यात. पयलीं मेळटा त्या विमानांतल्यान तांकां परतून हाडपाचे यत्न सुरू आसात अशें सांगलें.