भांगरभूंय | प्रतिनिधी
5 गांव ओडीएफ दर्जो तिगोवन दवरपाक अपेशी
भांगरभूंय । प्रतिनिधी
पणजी : गोंय राज्य उक्ताडार शौचमुक्त (ओडीएफ) जालां, पूण 373 गांवांनी ओडीएफ दर्जो तिगोवन दवरला. 5 गांव हो दर्जो तिगोवपाक अपेशी थारल्यात. पूण अभिमानाची गजाल म्हणल्यार गोंयांतल्या 368 गावांनी ही कामगिरी बरे भशेन फुडें व्हरून शौचालयांतल्या कोयराचें वेवस्थापन तशेंच प्रक्रिया करपाक सुरवात करून हे गांव ओडीएफ प्लस आदर्श गांव थारल्यात, अशी म्हायती स्वच्छ भारत मिशनच्या (ग्रामीण) अहवालांत दिल्या.
अहवालांत दिल्ले म्हायती प्रमाण एकादो गांव ओडीएफ मुक्त जाले उपरांत हो दर्जो तिगोवन उरचो हें सुनिश्चीत करपा खातीर तांचें तीन श्रेणींत वर्गीकरण जाता. पयले श्रेणींत जो गांव ओडीएफ दर्जो तिगोवन घन वा द्रव्य कोयराचें वेवस्थापन करता, तांकां ओडीएफ प्लस आकांक्षा मानांकन मेळटा, दुसरे श्रेणींत जे गांव ओडीएफ दर्जो तिगोवपा सयत घन तशेंच द्रव्य ह्या दोनूय कोयराचें वेवस्थापन करता, तांकां ओडीएफ प्लस उदयोन्मुख दर्जो जाल्यार जे गांव ओडीएफ दर्जो तिगोवपा सयत घन तशेंच द्रव्य दोनूय कोयराचें वेवस्थापन करपा वांगडाच गांवांत नितळसाण दवरून भौशीक सुवातेर म्हेळें उदक, प्लास्टीक कोयर एकठांय जावपाक दिना, तशेंच ओडीएफ प्लस विशीं जागृताय करता तांकां ओडीएफ आदर्श दर्जो मेळटा.
गोंयांतले 373 गांवा उक्ताडार शौचमुक्त (ओडीएफ) जाल्यात. पूण तातूंतल्या 368 गांवांनी ओडीएफ दर्जो तिगोवन दवरिल्ल्यान तांकां ओडीएफ प्लस हें मानांकन फावो जालां. जाल्यार पांच गांव हो दर्जो तिगोवपांक अपेशी थारल्यात. 368 मदल्या वट्ट 308 गांवांक सगल्यांत उंचेलें मानांकन ओडीएफ प्लस आदर्श गांव हें मानांकन फावो जालां. जाल्यार 2 गांवांक ओडीएफ प्लस उदयोन्मुख हें मानांकन मेळ्ळा जाल्यार 58 गावांक ओडीएफ प्लस आकांशा मानांकन फावो जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
