भांगरभूंय | प्रतिनिधी
मुख्यमंत्र्यांची विधानसभेंत लेखी जाप
पणजीः गोंयांत 13 पूल पुर्तुगेज काळांतले आसात आनी ह्या पुलांक 60 वर्सां पुराय जाल्यांत. तातूंतले दोन पूल 100 वर्सां पोरणें आसात अशी म्हायती भौशीक बांदकाम मंत्री डॉ. प्रमोद सावंत हांणी दिली.
फातोड्डेंचे आमदार विजय सरदेसाय हांणी विधानसभेच्या पटलार विचारिल्ल्या प्रस्नाक लेखी जाप दितना मुख्यमंत्री तशेंच भौशीक बांदकाम मंत्री डॉ. प्रमोद सावंत हांणी ही म्हायती दिली. पुराय गोंयभर 30 वर्सां पोरणें अशे वट्ट 110 पूल आसात. तातूंतल्या 13 पुलांक 60 वर्सां मायज जालीं.
हातूंत पोरण्या पाटो पुलाक 100 वर्सां मायज जालीं. तशेंच पोरणें हडफडेंच्या पुलाकय 100 वर्सां पुराय जाल्यांत. पोरणें शिरदोन पुलाक सुमार 90 वर्सां मायज जालीं.
पोरणें असोळणेंचो पूल आनी रावणफोंड पुलाक 70 वर्सां पुराय जाल्यांत. सांवड्डेंच्या पोरण्या पुलाक 70 वर्सां पुराय जाल्यांत. जाल्यार अर्धफोंड पूल आनी सांत इस्तेंव पुलाक 62 वर्सां पुराय जाल्यांत. खांडेपारच्या पोरण्या पुलाक 63 वर्सां मायज जालीं. विठ्ठलापूर सांखळे आनी दिवचलच्या पोरण्या पुलाची पिराय 60 वर्सां परस मायज आसा. जाल्यार राष्ट्रीय म्हामार्ग 748चेर आशिल्ल्या दोन सांकवांक 60 वर्सां पुराय जाल्यांत.
मजगतीं, कुमारजुंवें पूल, घंटामोरोड पूल, सत्तरी कल्टी न्हंये वेलो पूल, शिरगांव पूल, सालेरी पूल,बेंडवाडाे पूल ह्या सगल्या पुलांक 50 वर्सां पुराय जाल्यांत अशी म्हायती डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
