भांगरभूंय | प्रतिनिधी
पणजीः राज्यांतले सगले २३ खारीज अधिसुचीत करचे आनी तांकां शिंपणावळ कायद्या खाला हाडचें. तशेंच दर्यादेग वाठारांत रेंवेचे कडशे आसात ते पयलीं सारके जाग्यार हाडपा खातीर एक आराखडो तयार करचो, अशें बाणावलेचे आमदार वेन्झी व्हिएगस हांणी मागलो.
संसारीक पर्यावरणा दिसा निमतान आम आदमी पक्षाचे आमदार आनी फुडार्यांनी गोंयच्या सैमाक सतावपी वेगवेगळ्या विशयांचेर उजवाड घालो. ह्या वेळार व्हिएगस उलयताले. तांचे वांगडा वेळ्ळीचे आमदार क्रुझ सिल्वा, आपाचे फुडारी रामराव वाघ आनी सेसिल राॅड्रीग्स हजर आशिल्लीं.
अंदूच्या पर्यावरण दिसाची संकल्पना ‘प्लास्टिक प्रदुशणा आड झुजात’अशी आसा. मात दर वर्सा आमी थिमा फाटल्यान थिम दवरतात मात प्रदुशणाचो विशय कसोच सुटावो जायना, असो आरोप व्हिएगस हांणी केलो.
गोंयाच्यो खारीज आनी कडशें सरकाराचें अपेस दाखोवन दिता. राज्यांत २३ खारीज आसात. तातुंतले बाणावले, वार्का आनी कोलवाचे तीन खारिज पावसांत सैमीक कारणान फुट्टा. जी न्हंयेची दर्यांत वचपाची वाट उक्ती आसापाक जाय. खारीजाच्या उदका पोंदची जमीन उसपून सुकतेच्या पातळेर हाडून नितळ करून भरती-सुकती वेळार उदक भायर-भितर सरपाक जाय. मात सगळ्या खारीजांनी हें उदक आडकून उरता आनी लोक तातूंत घाणयारें उदक सोडटात, अशी म्हायती व्हिएगस हांणी दिली.
सरकारान पर्यावरण पुनर्स्थापना आराखडो तयार करून कडश्यांचे संरक्षण आनी खारीजांचो वेवस्थापनाचो आस्पाव करपाक जाय. सगलीं २३ खारीजां अधिसुचित करून ते शिंपाणावळ कायद्या अंतर्गत हा़डपाक तेन्ना हे खारीजां खातीर वेवस्थापन निधी येवन तांची देखरेख जातली. लोक सिवेजीचे उदक सोडटात. मात हें मतदार आशिल्ल्यान तांचेर कारवाय जायना. देखून थळाव्या आमदारांनी तांकां सिवेजीची जोडणी घेवन दिवची, अशी सुचोवणी व्हिएगस हांणी दिली.
साळ न्हंय ही न्हयेचे देगेक रावपी लोकांची जीवन वाहीनी आसली. मात ताची आतां पिरिस्थिती सामकीच वायट जाल्या आनी न्हंयेंत नुस्तें मारपाक कोण पांय लेगीत दवरिना, अशें क्रुझ सिल्वा हांणी सांगलें.
हें न्हंयेंत सिवेजीचें उदक सोडटात आनी हाचेर कसलेंच नियंत्रण नाशिल्ल्या कारणान गोंय प्रदुशण नियंत्रण मंडळान ही सगळ्यांत चड प्रदुशीत न्हंय म्हण जाहीर केली. कारण कितें घाणयारें उदक सोडटात ताचेर कसलेंच नियंत्रण ना. हे न्हंयेंत नुस्त्यांची पैदास जावपाचें बंद जालां. वेर्णा उद्देग वसणुकेचे उद्देग हे न्हंयेंत बाराय म्हयने म्हेळे उदक सोडटात देखून नुस्त्या वांगडा तिसर्यो आनी कालवांय गायब जाल्यांत, अशी कागाळ सिल्वा हांणी केल्या.
ही न्हंय आसली तशी जाग्यार घालपा खातीर पावलां उबारपाक जाय. हें करपा खातीर आमी नवें तंत्रगीन्यान हाडिल्लें, जातूंत सिवेजीच्या उदकाचेर प्रक्रीया जावन नितळ उदक न्हंयेंत वता. मात ताचेर २५ लाख चड खर्च येता म्हण ही तंत्रगीन्यान अजून मेरेन चालिक लावंक ना, असो आरोप सिल्वा हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
