गोंयचे रस्ते घातकी: १९४२ अपघातांची नोंद

भांगरभूंय | प्रतिनिधी

पणजी : गोंयांत अंदूं रस्ते अपघातांचो आंकडो मात्सो देवला, तरी गोंयचे रस्ते घातकी थारपाक लागल्यात. जानेवारी ते ३ नोव्हेंबर मजगतीं सुमार एक हजार, १९४२ अपघातांची नोंद जाल्या. तातुंतले जायते अपघात अतिवेगान, सोरो पियेवन वाहन चलोवप आनी भियेनासतना वा निश्काळजीपणान वाहन चलयिल्ल्यान जाल्यात.
गोंय येरादारी पुलिसांच्या अधिकृत आकडेवारी प्रमाण, जानेवारी ते ऑक्टोबर २०२५ मजगतीं राज्यांत २०५ घातकी अपघातांची नोंद जाल्या.
तातूंत २१२ जाणांक मरण आयलें. फाटल्या वर्सा ह्याच काळांत जाल्ल्या २२९ घातकी अपघातां परस मात्शे उणे आसात. फाटल्या वर्सा २४१ जणांक मरण आयिल्लें. गंभीर अपघातांचो आंकडो फाटल्या वर्सा १५१ वेल्यान अंदूं १८९ मेरेन वाडला. आनी ताची खरसाण ही गंभीर चिंतेची गजाल जाल्या. ह्या म्हयन्याच्या पयल्या तीन दिसांतूच गोंयांत सुमार १७ अपघात आनी दोगांक मरण आयलें आनी हें सत्र सुरूच आसा.
येरादारी अधिकार्‍यांच्या म्हणण्या प्रमाण, अतिवेगान वाहन चलोवप, सोरो पियेवन वाहन चालोवप आनी भियेनासतना, निश्काळजीपणान वाहन चलोवप हीं ताचें फाटलीं कारणां जावन आसात.
दर्यादेगांच्या पट्ट्यांत आनी महामार्गांचेर रातच्या वेळार सोरो पियेवन गाडी चलोवपाचें प्रमाण चड आसा. तशेंच, रातचें उसरां मेरेन गाडी चलोवप्यांक थकिल्ल्यान दोळो लागप हीय चिंतेची गजाल जावन आसा, अशें अधिकार्‍यांनी सांगलें. मंगळारा बांबोळे जाल्ल्या भिरांकूळ अपघातान हाचेर उजेड घाला. वेगान आयिल्ल्या टँकरान रस्त्याच्या डिवायडराक धपको दिवन, लेन हुपून, विरुद्ध दिकेन वचून ‘रेंट अ कार’क धपको दिलो. हातूंत अखील भारतीय सेपक टाक्रॉ संघटनेचे योगेंद्र सिंग आनी खेळगडे अंकित कुमार बालियान हांकां मरण आयलें. पुलिसांनी चालक सोर्‍याचे धुंदींत नाशिल्लो. मात, निश्काळजीपणां गाडी चलयिल्ल्याचें स्पश्ट जालें. चालक राहुल सरवदे हाचे आड सदोष मनीस वधाचो गुन्यांव नोंद करून कारवाय केली.
जानेवारी ते ऑक्टोबर २०२५ मेरेन, अधिकार्‍यांनी अतिवेगान गाडी चलोवपी १४,५०६, सोर्‍याचे धुंदींत गाडी चलयिल्ले खातीर ३,३६१ आनी निश्काळजीपणान गाडी चलयिल्ले खातीर ८३ चलन दिल्यांत. दुचाकी अपघातांचोय आंकडो वाडटा. अपघात नियंत्रणांत हाडपा खातीर विवीध पद्धतीन यत्न सुरू आशिल्ल्याचें पुलिसांनी सांगलें.