भांगरभूंय | प्रतिनिधी
डॉ. सावंत : भाजपा स्थापना दीस कार्यावळींत म्हणणें
भांगरभूंय । प्रतिनिधी
पणजी : गोंय मुक्तींत जनसंघाच्या खूबश्या फुडाऱ्यांनी लेगीत योगदान दिल्ले. फोटल्या 50 वर्सांत गोंयची जितली उदरगत जावंक नाशिल्ली, ताचे परस चड उदरगत भाजपाच्या डबल इंजीन सरकारान फाटल्या 10 वर्सांत करून दाखयल्या. गोंयच्या उदरगतीची धांव फुडल्या काळांत लेगीत कायम उरतली, अशी हमी मुख्यमंत्री डॉ. प्रमोद सावंत हांणी दिली.
भाजपाच्या स्थापना दिसा निमतान पणजेच्या पक्ष कार्यालयांत आयोजीत कार्यावळींत मुख्यमंत्री उलयताले. ह्या वेळार प्रदेशाध्यक्ष दामू नायक, केंद्रीय मंत्री श्रीपाद नायक, ज्येश्ठ फुडारी गोविंद पर्वतकार, आदले आमदार सिद्धार्थ कुंकळ्येकार हांचे सयत मंत्री, भाजप आमदार हजर आशिल्ले.
गोंयांत भाजप वाडोवपांत पोरणें फुडारी आनी कार्यकर्त्यांचें योगदान आसा. जनसंघाच्या खूबश्या फुडाऱ्यांनी गोंय मुक्तीच्या लढ्यांत वांटो घेतलो. ताका लागून तांचो विसर पडपाक जायना, अशें मुख्यमंत्री डॉ. सावंत हांणी सांगलें.
फाटल्या 10 वर्सांच्या काळांत गोंयची सर्वांगी उदरगत करपाक केंद्र आनी गोंयांतल्या भाजपा सरकाराक येस आयलां. गोंयची ही उदरगत हे फुडेंय कायम उरतली. ताका लागून भाजप कार्यकर्ते फुडलीं 100 वर्सां सक्रीय उरतले, अशी हमी मुख्यमंत्र्यान दिली.
काँग्रेसीन केंद्रांत आनी गोंयांत फक्त मतां खातीर राजकारण केलें. राजकी सुवार्था खातीर भारतीय राजघटना पांयां पोंदां मस्तिली. तेच खातीर गोंया सयत देशभरांतल्या लोकांनी भाजपाचेर विस्वास दवरलो, अशें केंद्रीय मंत्री श्रीपाद नायक हांणी सांगलें.
समाजसेवेक म्हत्वाचे सुवातेर दवरून पक्षा खातीर प्रामाणीकपणान काम केल्ल्या कार्यकर्त्यांक लागुनूच गोंयांतली भाजपाची संघटणा वाडत गेली, अशेंय नायक हांणी सांगलें.
मजगतीं, गोंयांत भाजपाचे वाटचालींत पोरणें फुडारी, पदाधिकाऱ्यांचें व्हड योगदान आसा. तांचो वावर आमी केन्नाच विसरपाक शकनात. येता त्या काळांत पक्षाक अदीक घटसाण दिवपाचे यत्न प्रदेशाध्यक्ष ह्या नात्यान आपूण करतलों, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
