भांगरभूंय | प्रतिनिधी
सुरेश वाडकरः गोंयच्या रसिकांची दाद सदांच उगडासांत उरतली
भांगरभूंय । प्रतिनिधी
वाळपयः 16 वर्सां उपरांत गोंयांत भक्तीमय कार्यावळ सादर करपाची संद मेळ्ळी. गोंयांतले संगीत मोगी खऱ्यांनीच दर्दी चाहते आसात. ते कलाकारांक बरी दाद दितात. गोंयचे मातयेच्या कणाकणांत संगीत आसा, अशें नामनेचे गायक सुरेश वाडकर हांणी सांगलें.
गीता यज्ञ समारोपा निमतान सांखळेच्या श्री विठ्ठल पंचायत देवस्थानांत सुरेश वाडकर आनी बेला शेंडे हांच्या गायनाची कार्यावळ आयोजीत केल्ली. ह्या वेळार वाडकर उलयताले.
गोंयांत कार्यावळ सादर करपाचो एक आगळोच अणभव आसता. मनाक प्रसन्न करपी ही गजाल. सांखळेच्या पांडुरंग देवस्थानाच्या प्राकारांत कार्यावळ सादर करतना उपस्थितांनी दिल्ली दाद सदांच उगडासांत उरतली. गोंयची भूंय ही पुण्य भूंय, अशें वाडकर हांणी सांगलें आनी मातयेचो तिबो कपलाक लायलो. विठ्ठलाच्या प्राकारांत सादर केल्ली गायनाची मैफल फुडल्या काळांत दरेकल्याच्या मनांत खोशयेचो वझरो निर्माण करतली, अशी आस्त तांणी उक्तायली.
गीता यज्ञाच्या समारोपा वेळार आयोजीत केल्ले कार्यावळींत सुरेश वाडकर हांचे वांगडा बेला शेंडे हांणी एका परस एक उत्कृश्ट गितां सादर केलीं. दरेका गिताक रसिकांनी भरभरून दाद दिली. मंत्री विश्वजीत राणे, आमदार डॉ, देविया राणे, प्रतापसिंह राणे आनी विजयादेवी राणे हांणी हे कार्यावळीचें आयोजन केल्लें.
सुरवेक कर्नाटकांतल्या भालचंद्र प्रभू हांच्या गायनाची कार्यावळ रंगली. विठ्ठलाची भक्ती निर्माण करपी ही कार्यावळ आकर्शक थारली. ते उपरांत सुरेश वाडकर, तांची घरकान्न आनी गायिका पद्मा वाडकर, बेला शेंडे हांच्या गायनान उपस्थीत रसिकांक रिझयले.
कानडा राजा पंढरीचा ह्या गितान कार्यावळीची सुरवात जाली. ते उपरांत मन हा मोगरा अशीं एका परस एक सरस गितां सादर केलीं.
सुरवेक गायक कलाकारांनी प्रतापसिंह राणे आनी विजयादेवी राणे हांचे आशिर्वाद घेतले. ह्या वेळार तांणी गायनाची मैफल सादर करचे खातीर संद दिल्ले खातीर राणे परिवाराचे उपकार मानले. गायक सुरेश वाडकर, पद्मा वाडकर आनी बेला शेंडे हांचो भलायकी मंत्री विश्वजीत राणे आनी डॉ. दिव्या राणे हांचे हस्तुकीं विट्ठल मंदिराचे गर्भकुडी मुखार शाल, नाल्ल आनी भेटवस्तू दिवन भोवमान केलो. विठ्ठलाच्या प्राकारांतले संगिताचे सूर हे दरेकल्या मनांत निश्चीत खोशी निर्माण करतले, अशें मंत्री राणे हांणी सांगलें. हे कार्यावळीचो आस्वाद घेवचे खातीर मंत्री रोहन खंवटे, गोविंद गावडे, सुभाष शिरोडकार, भाजप प्रदेशाध्यक्ष दामू नायक, आमदार आलेक्स रेजिनाल्ड, प्रेमेंद्र शेट, डॉ. चंद्रकांत शेट्ये आनी हेर मानेस्त हाजीर राविल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
