भांगरभूंय | प्रतिनिधी
पणजी: नवे पोप लिओ XIV हांणी गोंयच्या जेसुइत फादर रिचर्ड अँथनी डिसोझा हांची व्हॅटिकन ऑब्झर्व्हेटरीचे संचालक म्हणून नियुक्ती केल्या. फादर डिसोझा (४७) हे खगोलशास्त्रांत डॉक्टरेट केल्ले संशोधक आशिल्ल्यान २०१६ पसून ह्या प्राचीन ऑब्झर्व्हेटरींत ते वैज्ञानीक म्हणून कार्यरत आसात.
पोप लिओ XIV हांणी म्हजी निवड केल्ल्यान म्हाका सामकें सन्मानीत केल्ले वरीं दिसता, अशें फादर डिसोझा हांणी सांगलें. ह्यान पयलीं जायते नामनेचे जेसुइत ह्या पदार आशिल्ले. ही एक व्हड जबाबदारी जावन आसा. ह्या काळांत विस्वास आनी विज्ञान हातुंतलो संवाद आनीक बरो करपा खातीर आनी विज्ञानीक संशोधना वरवीं व्हॅटिकन ऑब्झर्व्हेटरीची दिका थारावपाचें म्हत्वाचें काम म्हज्या हातांत आयलां, अशें तांणी मुखार सांगलें. फादर डिसोझा हे ब्रदर गाय कन्सोलमॅग्नो, एस. जे. हांचे उपरांत ही जापसालदारकी स्विकारतले. ब्रदर कन्सोलमॅग्नो हांचो कार्यकाळ १९ सप्टेंबर २०२५ दिसा सोंपता.
फादर डिसोझा हांचे विवीध आंतरराष्ट्रीय खगोलशास्त्रीय नियतकालिकांत लेख प्रसिद्ध जाल्यात. ते आंतरराष्ट्रीय खगोलशास्त्र संघटणेचे वांगडी आसात. तांच्या नांवार हालींच एक लघुग्रह आयला.
गोंयची फाटभूंय:
तांचो जल्म १९७८ वर्सा पुण्याक जालो. तांचो मूळ गांव पिळर्ण. उपरांत तांचें कुटूंब म्हापशां आयलें. तांचें भुरगेंपण कुवेतांत गेलें. १९९० वर्सा उपरांत ते गोंयांत परतले आनी म्हापशेंच्या सेंट ब्रिट्टो हायस्कुलांत शिक्षण घेतलें.
१९९६ वर्सा तांणी जेसुइत पंथांत प्रवेश केलो. तांणी २००२ वर्सा मुंबयच्या सेंट झेवियर्स कॉलेजींतल्यान भौतीक शास्त्रांत पदंवी मेळयली. उपरांत जर्मनींतल्या हीडेलबर्ग विद्यापीठांतल्यान तांणी पदव्युत्तर शिक्षण पुराय केलें.
२००५ वर्सा पुण्याक परतून तांणी तत्त्वज्ञानांत पदवी घेतली आनी २००७ वर्सा बेळगांवां शाळा सोडिल्ल्या विद्यार्थ्यां सातीर ‘सेंट पॉल्स कम्युनिटी कॉलेज’ स्थापन केली. २०११ वर्सा पुण्याचे ज्ञानदीप संस्थेंतल्यान धर्मशास्त्रांत पदवी घेतले उपरांत तांणी धर्मगुरुपद स्विकारलें. उपरांत तांणी गोंयांत ‘डिपन युवर फेथ’ नांवाच्यो धर्मशास्त्राचेर आधारीत कार्यावळ चालीक लायल्यो. २०१९ वर्सा ते कॅस्टेल गॅन्डोल्फोच्या व्हॅटिकन ऑब्झर्व्हेटरीच्या मुख्यालयांत दाखल जाले. २०२२ सावन ते थंयच्या जेसुइत समुदायाचे अधीक्षक म्हणून कार्यरत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
