भांगरभूंय | प्रतिनिधी
केंद्रीय पर्यटन मंत्री गजेंद्र सिंग शेखावत हांची म्हायती
पणजी ः गोंयांतल्या पर्यटन क्षेत्राक चालना दिवपा खातीर केंद्र सरकारान राज्याक मजत केल्या. गोंयच्या पर्यटन उदरगती खातीर केंद्र सरकारान 2014 ते 2023 ह्या काळांत राज्याक 298.3 कोटी रुपयांची मजत दिल्या. केंद्रीय पर्यटन मंत्री गजेंद्र सिंग शेखावत हांणी लोकसभेंत दिल्ल्या लेखी जापेंतल्यान ही म्हायती मेळ्ळ्या. हे संबंदी खासदार विरीयातो फर्नांडीस हांणी अतारांकित प्रस्न मांडिल्लो.
जापेंत दिल्ले म्हायती प्रमाण, राज्यांत पर्यटन मुळावी सुविधा तयार करपा खातीर 2014 वर्सा 8.79 कोटी रुपयांचो निधी मंजूर केल्लो. हो निधी एमपीटी हांगा क्रूझ टर्मिनल इमारत बांदपा खातीर मंजूर जाल्लो. 2018 वर्सा हांगा क्रूझ बर्थ आनी हेर सुविधा उबारपाक 13.16 कोटी रुपया मंजूर केल्ले. जाल्यार 2021 वर्सा हांगा थळावे आनी आंतरराष्ट्रीय क्रूझ टर्मिनल आनी हेर सुविधा बांदपा खातीर 50 कोटी रुपया मंजूर केल्ले.
केंद्राच्या स्वदेश दर्शन येवजणे खाला 2016-17 वर्सा गोंयाक 97.65 कोटी रुपया मंजूर केल्यात. हातूंतल्यान सिकेरी, बागा, हणजूणा, आग्वाद किल्लो बंदखणींत उदरगतीचीं कामां केलीं. जाल्यार 2017-18 वर्सा हे येवजणे खाला डोना पावलां, बाणावली, कोलवा हांगा उदरगत कामां केलीं. हे खातीर 99.35 कोटी रुपया मंजूर केल्लें. स्वदेश दर्शन 2.0 खाला पर्वरी आनी कोलवा उदरगतीच्या कामां खातीर 39.21 कोटी रुपया मंजूर केल्ले.
केंद्राच्या डीपीपीएच येवजणे खाला 2020-21, 2021-22 आनी 2022-23 वर्सा 1.5 कोटी रुपया मंजूर केल्यात. हातूंत दर वर्सा शिगमो आनी कार्निवल महोत्सवा खातीर दरेकीं 25 लाख रुपया दिल्लें. केंद्र सरकारान पर्यटनाक चालना दिवपा खातीर पर्यटन मित्र, पर्यटन दीदी, देखो अपना देश, चलो इंडिया, भारत पर्व अशें वेगवेगळे उपक्रम सुरू केल्यात अशें लेखी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
