भांगरभूंय | प्रतिनिधी
इंडी आघाडीन केली बी. सुदर्शन रेड्डींच्या नांवाची घोशणा
पणजी : सर्वोच्च न्यायालयाचे आदले न्यायमुर्ती आनी गोंयचे पयले लोकायुक्त बी. सुदर्शन रेड्डी हे उपराष्ट्रपती पदा खातीर इंडी आघाडीचे उमेदवार आसात. बी. सुदर्शन रेड्डी हे मार्च २०१३ वर्सा गोंयचे लोकायुक्त जाल्ले. सुमार ७ म्हयन्यां उपरांत व्यक्तीगत कारणां खातीर तांणी राजीनामो दिल्लो.
आदले मुख्यमंत्री सर्गेस्त मनोहर पर्रीकार हांच्या कार्यकाळांत गोंयांत पयल्या लोकायुक्तांची नेमणूक जाली. हैदराबाद (आंध्र प्रदेश) हांगा १९७१ वर्सा वकिली सुरू केले उपरांत रेड्डी हे १९९५ वर्सा आंध्र प्रदेश उच्च न्यायालायांत न्यायाधीश जाले. २००५ वर्सा ते गुवाहाटी उच्च न्यायालयाचे मुखेल न्यायाधीश जाले. २००७ वर्सा सर्वोच्च न्यायालयाचे न्यायमुर्ती जावन २०११ वर्सा ते निवृत्त जाले.
रालोआचे उमेदवार सी. पी. राधाकृश्णन आनी बी. सुदर्शन रेड्डी हांचे मदी उपराष्ट्रपती पदाखातीर लढत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
