भांगरभूंय | प्रतिनिधी
मुख्यमंत्री : क्यूएस इंडिया परिशदेचें उक्तावण
भांगरभूंय । प्रतिनिधी
पणजी : पारूल, गणपत, एमआयटी अशीं विद्यापिठां गोंयांत सुरू जावपाचीं आसात. उंचेल्या शिक्षणाचो दर्जो वाडोवन गोंयचे पदवेक पुराय संवसारांत प्रतिश्ठा मेळची अशें तरेचे बदल सुरू आसात, अशें मुख्यमंत्री डॉ. प्रमोद सावंत हांणी म्हणलें.
दोना पावल हांगा क्यूएस इंडिया परिशदेचें उक्तावण मुख्यमंत्री डॉ. प्रमोद सावंत हांचे हस्तुकीं जालें. ह्या वेळार मुखेल सोयरे ह्या नात्यान ते उलयतालें. परिशदेंत विवीध संस्थांचे प्रतिनिधी तशेंच शिक्षणतज्ञ वांटेकार जाल्यात.
गोंयची पदवी ही हेर खंयच्याच विद्यापीठ वा संस्थेचे पदवी इतलीच सक्षम आनी सर्तींत तिगपी आसपाक जाय. हाका लागून गोंयच्या पदवीधराक संवसारांत नोकरी मेळपा सयत ताका प्रतिश्ठा मेळपाक जाय. गोंयांत शिक्षणीक वाठारांत व्हड बदल सुरू आसात. शिक्षणाचें प्रशासन, अभ्यासक्रम हातूंत डिजिटल ट्रान्सफॉर्मेशन सुरू आसा. बदलतो काळ तशेंच तंत्रज्ञानाचेर आदारीत अभ्यासक्रम करपा सयत शिक्षणीक सुविधा वाडत आसा. प्लेसमेंटा खातीर रोजगार कार्यावळी करपा सयत म्हाविद्यालयांनी संशोधन केंद्रां स्थापन जाल्यात अशें मुख्यमंत्र्यान सांगलें. गोंयांत आयआयटी, एनआयटी, इंटरनॅशनल लॉ, भारतीय आयुर्वेद अशो नामनेच्यो संस्था आसात. हे भायर आतां एमआयटी, गणपत, पारूल अशीं विद्यापिठां स्थापन जावन तरेकवार अभ्यासक्रम सुरू जातले. हाका लागून गोंय हें दर्जेदार शिक्षणाचें आनी संशोधनाचें केंद्र जातलें. देशांतली 54 विद्यापिठा हीं संवसारीक मळार उंचेल्या मानांकनाची विद्यापिठां जावन आसात. देशाची अर्थवेवस्था फुडें व्हरपा सयत सामाजीक बदला खातीर शिक्षण, कुशळटाय आनी नवनिर्मितचो हांवेस धरपाचो उलो प्रधानमंत्री नरेंद्र मोदी हांणी मारला, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
