भांगरभूंय | प्रतिनिधी
पणजी : कला, विज्ञान फांट्याची पदवी घेवन एलडीसीची नोकरी मागपाचे दीस गेल्यात. गोंयांत खुबश्यो नव्यो करिअर संदी तयार जाल्यात. हाचो विद्यार्थ्यांनी लाव घेवचो, असो उलो मुख्यमंत्री डॉ. प्रमोद सावंत हांणी मारलो. शुक्रारा पणजे आयोजीत करिअर मार्गदर्शन शिबिराच्या उक्तावणा वेळार ते उलयताले. ह्या वेळार कामगार मंत्री बाबूश मोन्सेरात, सचिव संदीप जॅकीस, राजेश आजगांवकार आनी हेर अधिकारी हाजीर आशिल्ले.
मुख्यमंत्र्यान म्हणलें, आयटीआय सावन आयआयटी मेरेन खुबशे शिक्षणीक अभ्यासक्रम आसात. विवीध राष्ट्रीय संशोधन, शिक्षण संस्थांनीय संदी आसात. थळाव्या विद्यार्थ्यांनी हाचो लाव घेवप गरजेचें. आयच्या डिजिटल युगांतलें रोबोटीक, डेटा सायन्स, गेम डेव्हलपमेंट, एआय, सायबर सुरक्षा, डिजिटल मिडिया अशें विवीध करियर पर्याय समजून घेवचे. फकत गोंयांतूच नोकरी, रोजगार करतले असो आग्रो नाका. बरी संदी मेळ्ळ्यार देशांत, संवसारांत खंयसरूय काम करपाची तयारी आसपाक जाय.
तांणी म्हणलें, राज्य सरकारान स्टार्टअप, लॉजिस्टिक धोरण हाडलां. विद्यार्थ्यांनी ताचो आतांच्यानूच अभ्यास केल्यार शिक्षण पुराय जालें काय आपल्याक ह्या मळार नेमकें खंयचें करियर करपाचें आसा हें तांकां समजलें. विद्यार्थ्यांनी राज्यांतलें पर्यटन, लॉजिस्टीक, एविएशन नुस्तें वेवसाय, बोट बांधणी आनी हेर वाठारांतल्यो करियर संदी सोदच्यो. हे खतीर सरकारान सुरू केल्ल्यो शिश्यवृत्ती, रीण आनी हेर येवजण्यांचो फायदो करून घेवचो. विद्यार्थ्यांनी विकसीत भारत तशेंच विकसीत गोंयां खातीर योगदान दिवचें. हे खातीर व्हड विचार करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
