गोंयचे धंदे गोंयकारांच्या हातांत आसात?

भांगरभूंय | प्रतिनिधी

गोंयकारांच्या हातांतलो एकसुरो टॅक्सी धंदो भायल्यांच्या हातांत दिवं नाकात म्हणपाच्यो आड्डी सद्याक आयकूंक येतात. सरकार अॅप बेज्ड टॅक्सी करूंक सोदता आनी टॅक्सीकार अॅप एग्रिगेटाक विरोध करतात. तांकां अॅप नाका. तांकां आपणाक जाय तसोच धंदो चलोवचो आसा, तातूंत सरकारचो हस्तक्षेप नाका. अॅप आयलें जाल्यार हो धंदो गोंयां भायल्यांच्या हातांत वतलो अशें तांचें म्हणणें. टॅक्सीचो धंदो गोंयकारांच्या हातांत आसा हें आयकून हांसचें काय कितें तेंच पयलीं कळना. प्रत्यक्षांत जेन्ना टॅक्सीकारां कडेन संबंद येता तेन्ना खरें कितें तें कळटा. आसत कांय टक्के गोंयकारांच्यो टॅक्सी पूण चडावत टॅक्सीकार भायलेच आसात हें मानून घेवचेंच पडटलें. टॅक्सीच कित्याक, रिक्षा आनी मोटारसायकली लेगीत केन्ना भायल्यांनी आपल्या हातांत घेतल्यात.
पयरूच एकलो सांगतालो, कोणाचीय रिक्षा विकूंक आसा म्हूण कळ्ळ्यार भायले पयशे हातांत घेवन तयार जातात. कितलेय पयशे दिवन ते रिक्षा, टॅक्सी घेतात. कारण तांकां ह्या धंद्यांतली गोम कळ्ळ्या. आमचे लोकूय चड पयशे मेळटात म्हणून आपणाली टॅक्सी, रिक्षा तांकां विकतात. तांचोय म्हूण गुन्यांव ना. इतलीं वर्सां धंदो केलो, ताचेर संवसार चलयलो. आतां पिराय जाली म्हणटकूच धांवपळ जमना, पयसुल्लो प्रवास शक्य जायना. तातूंत टुरिस्ट सारके मेळटाच अशेंय ना. वाद, झगडीं करप शक्य जायना. तांच्या शिकिल्ल्या भुरग्यांक ह्या धंद्यांत येवपाचें ना. ते हेरां वरींच सरकारी नोकरी कशी मेळटली हाचो विचार करतात. वा खंय तरी नोकरी करून आपणालो उदर निर्वाह करतात. आयच्या भुरग्यांक तकलेक चड ताण नाका. ते नोकरेंत समाधानी. कांय जाणांक टॅक्सी धंद्याची लज दिसता. मागीर हो धंदो दवरप तरी कित्याक?
इल्लो इल्लो धंदो भायल्यांच्या हातांत पावला आनी कांय दिसां उपरांत तो पुराय भायल्यांच्या हातांत वतलो हातूंत दुबाव ना. जेन्ना गोंयकारूच ह्या धंद्यांतल्यान इल्ले इल्ले भायर सरतात तेन्ना धंदो भायल्यांच्या हातांत दिवं नाका म्हणप कितलें सारकें? आतां जे कोण ह्या धंद्यांत आसात तांकां मातूय बदल जाल्लो नाका. तशें तांकां चड काम करपाक नाका. एक -दोन भाडीं मेळ्ळीं तर पुरो तांकां. एक वा दोन भाड्यांतल्यान कशें जोडप हें ते बेस बरें जाणात. आनी हाचोच फायदो जे गोंयांत येवन रावल्यात आनी टॅक्सीकार जाल्यात ते घेतात. बिजापूर, बागलकोट ह्या वाठारांतल्यान येवन गोंयांत स्थायीक जाल्ले जायते लोक आयज टॅक्सीच्या धंद्यांत आसात. मुद्दम मडगांव रेल्वे स्थानक वा वास्को वचून पळयात. एका टॅक्सी वेल्यान तांणी चार चार टॅक्सी केल्यात आनी ड्रायव्हर दवरून ते धंदो करतात. पूण प्रवाशां कडेन नमळायेन वागतात. तांचो दरूय हेरां परस उणो. ते आपल्या वागण्यान मनशां सांबाळटात. तांकां खबर आसा प्रवाशा कडेन नमळायेन वागल्यार आपणालें भाडें दुसरे कडेन वचचें ना. दुसरे फावटी तें आपणाकूच मेळटलें. गोंयचे टॅक्सीकार तशे नात. ते आरे तुरे करून वागतले. गिरायका कडल्यान मेळत तशें भाडें घेतले. दुसरे फावटी तें गिरायक मेळूं वा नाका. देखुनूच तर तांकां लोकांची सहानभुती मेळना.
तशें पळोवंक गेल्यार टॅक्सीच कित्याक गोंयकारांच्या हातांत कसलोच धंदो उरूंक ना. एका काळार गोंयची बार्रां गोंयकार आँटी-अंकलांच्या हातांत आसलीं. ह्या धंद्यांत वचपाचें कोणूच धाडस करिनासलो. पूण आयज कितें? शारांनीच न्हय तर गांवांनी लेगीत उडपी आनी पंजाबी बार्रां चलयतात. हॉटेलांय तशींच, गोंयकारांच्याच हातांत आसलीं. आयज कसलें चित्र दिसता? गोंयकारांक सगलें आयतें मेळ्ळ्यार पुरो. त्रास कोण काडटलो? धंदो करूंक कश्ट करचे पडटात. ते परस तो भाड्याक दिल्यार बशिल्ले कडेन भाडें मेळटा.
मडगांवचें गांधी मार्केट एका काळार गोंयकारां कडेनूच आसलें. आयज थंय गोंयकार नांवांक तरी मेळटात जाल्यार पळेयात. न्यू मार्केटांत काल-पयर पसून गोंयकार धंदे करतालो. सद्याक तेंय इल्लें इल्लें मारवाड्यांच्या हातांत वचूंक लागलां. कांय तेंपान थंयूय गोंयकार वखदाक लेगीत मेळचो ना काय दिसता. जेन्ना बशिल्ले कडेन तीस पस्तीस हजार भाडें मेळटा तेन्ना त्रास कित्याक काडूंक जाय? नगरपालिकेक शंबर रुपया फारीक करपाचे आनी आपणें हजारांनी बोल्सांत उडोवपाचे. एकदां तांच्या हातांत सोंपयिल्लो धंदो परतो आमच्या हातांत येतलो? शक्यूच ना. एकदीस तेच हांगाचे राजा जावन बसतले. आमीच चूड दाखोवन हो म्हारू घरांत हाडटात हें कशें कळना काय आमकां? आमीच अशे वागतले आनी मागीर सरकारा नांवांन शबय घालतले.
हालींच ट्रेनींत एक मनीस मेळ्ळो. ताचे कडेन उलयतना तो वास्को रावता आनी ताची टॅक्सी आसा म्हणपाचें कळ्ळें. अब्दुल्ला मुळचो कर्नाटकांतलो. भुरगेपणांतूच बापूय शीक शीक करून फाटीक लागता म्हणून घर सोडून पळून आयलो आनी वास्को एका हॉटेलांत कामाक लागलो. घरा तशें कांयच उणें नासलें, सामको सधन घरांतलो भुरगो हो. फक्त हाका शिकूंक नाका आसलें. पूण बापूय आयकना म्हणून हो घरांतल्यान भायर सरिल्लो. वास्को काम करतां करतां तो गाडी चलोवंक शिकलो. आरटीओ कडल्यान लायसन आनी बॅच काडलो आनी टॅक्सी घेतली. सद्याक टॅक्सी गोवा मायल्साक लायल्या. तो सांगता ते प्रमाण दीसभर तो कसोच बेकार उरना. भाडेंय उणेंच घेता आनी लाखांनी जोडटा. ताचे वागणुकेक लागून लोक ताका रावतात. रातचेय ताका आपयतात आनी तो वाजेनासतना धांवत वता. कोणूय अडलो म्हूण ताचे कडसून चड दुडू मागना. देखून लोकांक तो जाय. जातलें आमच्या गोंयकारां कडेन अशे तरेन धंदो करूंक?

अभयकुमार वेलींगकार
9423884687