भांगरभूंय | प्रतिनिधी
सद्या 55 वो इफ्फी सुरू जाला. ह्या निमतान विंगड विंगड कलाकृती रसिकांक पळोवपाक मेळटात. तांचो अभ्यास करूंक मेळटा. व्हड कलाकारांक मेळपाची संद मेळटा. गोंयचे साहित्यकर, रवीन्द्रबाब केळेकार, सुटके झुजारी मोहन रानडे हांचेर केल्ले लघुपट इफ्फींत पळोवपाक मेळटले. अशें जरी आसलें तरी दोन गोंयकार संगीतकार जांणी भारतीय सिनेमाक व्हड करपाचो यत्न केलो, तांची याद येवप सभावीक. ते आसात, आरोब्यां- पेडणेंचे एन. दत्ता आनी दुसरे माजोड्डेंचे अँथनी प्रभू गोन्साल्वीस. दोगांयचो वाडदीस 12 तारखेरूच, वर्स वेगळें. एकल्याचो 12 जानेराक तर दुसऱ्याचो 12 जूनाक.
ह्या दोगांची म्हायती तुमकां गुगलाचेर वाचूंक मेळटा. एन दत्ता हांकां मेळपाक शकलों ना. पूण आपल्या गांवांत रावपाक आयिल्ल्या अँथनी गोन्साल्वीस बाबाक मात मेळपाची, तांचे लागीं उलोवपाची संद मेळ्ळी. नवनाथ नेरुरकार हांणी दत्ता सायबांची ते आराब्यार तांच्या मूळ गांवांत वळख करून दिल्ली हें याद आसा. पूण तेन्ना हांव ल्हान.
एन. दत्ता हाचें ल्हानपणार अभ्यासाचेर न्हय तर संगीत अभ्यासाचेर लक्ष आसलें. तांणी आपल्या मामाक तशें सांगलें. मामाक तें आवडूंक ना. पूण करतलो कितें? जरी दत्तासायबाचो जल्म मुंबय जाल्लो तरी ते आरोब्यां राविल्ले. थंयच्या पिंपळा पेडार बेरेस्ताराचीं भजनां चलतालीं तीं आयकताले. संगीत नाटकां येतालीं तीं लेगीत रात जागोवन ते पळयताले. एक दिसा ताणें मामाक मनांतलें सांगलें. आपल्याक संगीत शिकपाचें आसा, हें सगळें तो बारा वर्सांचो आसतना. ताणें वेळ करिनासतना मुंबय गांठली. फक्त संगीत शिकपाक. पिरायेच्या बाराव्या वर्सा. मागीर संगीत शिकले आनी सिनेमा जगान व्हड नांव केलें. कितल्याशाच चित्रपटांक तांणी संगीत दिलें. साहिर लुधियानवी ह्या इश्टान तांकां खाशेली गीतां दिल्लीं. तुमका जर बरीं पदां मेळ्ळीं तर तुमी तांकां चाल लावन तांचें भांगर करूं शकतात. संगीतकाराक चाल सुचपाक ताची मजत जाता. आयज लेगीत तुमकां यू ट्युबाचेर दत्ता सायबान संगीत दिल्लीं लोकप्रीय पदां आयकुपाक मेळटात. विवीध भारतीचेर लेगीत तीं आयकूंक मेळटात. तांचो चलो रूप नायक आरोबा गांवांत येता. आपल्या बापायची याद म्हूण ताणें अनुबोधपट लेगीत तयार केला. तो जर रसिकांक पळोवपाक मेळत तो लेगीत इफ्फींत तर अभ्यासकांक, रसिकांक शिकूंक मेळूंक शकता. 56 व्या महोत्सवांत हाचो विचार जावचो अशें नमळायेन सुचयेनशें दिसता.
दुसरे आसात अँथनी गोन्साल्वीस. तांकां मेळपाची संद म्हाका मेळ्ळी. तांचे वडील लागींचे चर्चींत ‘कोयर मास्टर’ आशिल्ले. ल्हान अँथनीन संगीताचे धडे पाय कडल्यान घेतले. ते बरे पैकी व्हायोलीन वाजयताले. मुंबय वतकूच ह्या व्हायोलिनानूच तांकां नांव मेळोवन दिलें. लक्ष्मीकांत- प्यारेलाल मदले प्यारेलाल हे अँथनी कडेन व्हायोलीन शिकले. प्यारेलाल गोंयांत येतकच आपल्या गुरुक अँथनीक मेळटालेच. तर अशे हे अँथनी मुंबय वचून व्हड संगीत नियोजक म्हूण काम करूंक लागले. तांणी संगितूय दिलां. नौशाद हे पयले संगीतकार. अँथनी अमेरिकेंत गेले. मागीर गोंयांत पावले. ह्या दोगांयचें स्मरण इफ्फीच्या महोत्सवाक लागून जाता. अभ्यासकां खातीर हीं दोन नांवां चड म्हत्वाचीं. गोयंकारांनी चंदेरी विश्वाक योगदान दिलां हें कळूंक जाय म्हूण. खरें तर तांची याद फुडल्या महोत्सवांत आयोजकांनी जरूर करची. नवे पिळगे खातीर.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
